Si pasojë e reshjeve të mëdha të borës, shumë vendbanime në Kosovë kanë mbetur të izoluara.
Vendet që kanë pësuar më së shumti nga moti i ligë këto tri ditë, janë fshatrat malore si ato të Dragashit, Kaçanikut, Mitrovicës dhe Kamenicës, raporton KTV.
Hiç më mirë nuk ka kaluar as Komuna e Podujevës.
Banorë të një lagjeje në Herticë kanë qenë të detyruar që të hapin një rrugë alternative, pasi është dita e tretë që komuna nuk ka ndërmarrë asgjë për hapjen e rrugës.
Opozita këtë e quan papërgjegjësi të qeverisjes komunale, pasi sipas tyre, kanë kontraktuar vetëm një kompani për mirëmbajte, e cila nuk ka kapacitet të mjaftueshëm, marrë parasysh territorin e Podujevës.
Edhe zyrtarët komunalë e pranojnë se gjendja nuk është e mirë pas reshjeve të borës.
Por, thonë se në disa fshatra, ortekët e mëdhenj të borës kanë bllokuar rrugët dhe ka qenë e pamundur të hapet rruga me kamionët e rëndomtë për pastrimin e borës, prandaj është angazhuar mekanizëm shtesë, për pastrimin e tyre.
Opojanet ka hapur kanalin në Whats App dhe ju mund të na bashkoheni për të ndjekur lajmet tona BASHKOHU KËTU.
