Në Kuvendin e pestë Zgjedhor të Sindikatës së Policisë së Kosovës, i mbajtur sot në sallën e konferencave të Stacionit Policor “Qendra”, Avdi Hoti u zgjodh kryetar i ri me shumicë votash, ndërsa Edita Azemi u zgjodh nënkryetare.
Kryetari i BSPK-së, Atdhe Hykolli, theksoi rëndësinë e sindikatës në avancimin e të drejtave të pjesëtarëve të Policisë së Kosovës.
“Përmes këtij forumi ne jo vetëm që reflektojmë mbi arritjet dhe sfidat, por gjithashtu nderojmë rrugën për të ardhmen – një të ardhme të sigurt, më të drejtë dhe më të denjë për të gjithë pjesëtarët e Policisë së Kosovës. Jemi të vetëdijshëm për sfidat me të cilat përballet policia jonë, qoftë në aspektin e punës, ashtu edhe në atë social-ekonomik, por jemi po aq të vendosur që përmes organizimit dhe zërit sindikal t’i realizojmë të gjitha kërkesat e punonjësve të Policisë së Kosovës”, tha ai.
Ndërsa Hoti vlerësoi kuvendin si shprehje të demokracisë sindikale dhe u zotua për përkushtim ndaj përmirësimit të kushteve të punës dhe mirëqenies së pjesëtarëve të policisë.
Opojanet ka hapur kanalin në Whats App dhe ju mund të na bashkoheni për të ndjekur lajmet tona BASHKOHU KËTU.
