Në përvjetorin e rëndësishëm të 28 Nëntorit, Ditës së Flamurit, Presidentja e Kosovës, Vjosa Osmani, ka theksuar rëndësinë historike të kësaj dite, duke e quajtur atë si boshtin e krenarisë kombëtare për shqiptarët.
Përmes një postimi në Facebook, ajo u shpreh se kjo datë përbën një simbol të unitetit dhe të luftës për liri, përkujtim i ngjarjeve të mëdha që kanë shënuar historinë e kombit shqiptar.
“Dita e Flamurit, e Pavarësisë së Shqipërisë, e lindjes së Komandantit Legjendar Adem Jashari dhe e daljes së parë publike të Ushtrisë Çlirimtare të Kosovës, janë katër ngjarje që përbëjnë boshtin e krenarisë sonë kombëtare,” theksoi Presidentja Osmani.
Ajo e lidh këtë ditë me momentet më të shenjta të historisë shqiptare, duke përmendur ngjarje që nga Kruja e Skënderbeut, te Vlora e Ismail Qemalit dhe Prekazi i Jasharajve, si pika kyçe të luftës dhe sakrificës për lirinë dhe unitetin e kombit.
“Nga Kruja e Skënderbeut, te Vlora e Ismail Qemalit dhe Prekazi i Jasharajve, historia jonë është shkruar me gjak, guxim dhe besim. Sot, Kosova dhe Shqipëria ecin krah për krah: dy shtete, një komb, dy flamuj, një zemër,” u shpreh Osmani, duke theksuar se lidhja e thellë ndërmjet Kosovës dhe Shqipërisë është një testament i forcës dhe solidaritetit të popullit shqiptar.
Presidentja Osmani përfundoi mesazhin e saj me urime për shqiptarët kudo që ndodhen, duke lavdëruar sakrificat e mëdha të atdhetarëve, dëshmorëve dhe heronjve të kombit, sidomos Komandantit legjendar Adem Jashari.
“Gëzuar Ditën e Flamurit! Gëzuar Pavarësinë e Shqipërisë! Lavdi Komandantit Adem Jashari dhe të gjithë heronjve, dëshmorëve e martirëve të kombit tonë!”, u shpreh ajo.
Opojanet ka hapur kanalin në Whats App dhe ju mund të na bashkoheni për të ndjekur lajmet tona BASHKOHU KËTU.
