Përfaqësuesja e Lartë e Bashkimit Evropian për Politikë të Jashtme dhe Siguri, Kaja Kallas, zhvilloi takime të ndara me kryeministrin e Kosovës, Albin Kurti, dhe presidentin e Serbisë, Aleksandër Vuçiq.
Në fokus të bisedimeve ishte dialogu Kosovë-Serbi dhe nevoja për të bërë hapa konkretë drejt normalizimit të marrëdhënieve. Kallas theksoi se përparimi në këtë proces duhet të shkojë paralelisht me avancimin e Kosovës dhe Serbisë në rrugën drejt Bashkimit Evropian.
Përmes një reagimi në X, Kallas rikujtoi se marrëveshjet e arritura në kuadër të dialogut të ndërmjetësuar nga BE-ja, përfshirë Marrëveshjen e Ohrit, duhet të zbatohen.
Ajo tha se zbatimi i marrëveshjeve nuk duhet parë si një favor ndaj Brukselit, por si përgjegjësi ndaj qytetarëve dhe stabilitetit të rajonit.
Kallas deklaroi gjithashtu se BE-ja do të vazhdojë rolin e saj si ndërmjetësuese e paanshme, por theksoi se ndërmjetësimi evropian nuk mund ta zëvendësojë vullnetin politik të palëve.
Ndërkohë, kryeministri Kurti kishte bërë të ditur më herët se ishte takuar me Kallas, por në njoftimin e tij fillestar nuk kishte specifikuar nëse dialogu me Serbinë ishte pjesë e diskutimeve.
Opojanet ka hapur kanalin në Whats App dhe ju mund të na bashkoheni për të ndjekur lajmet tona BASHKOHU KËTU.
