Dragash, 10 maj 2025 – Kryetari i Komunës së Dragashit, z. Bexhet Xheladini, ka reaguar pas publikimit të një vendimi nga Drejtoria e Parkut Nacional “Sharri”, që ndalon aktivitetet me mjete motorike në territorin e parkut. Ky vendim ka ngjallur reagime të shumta nga qytetarët, veçanërisht nga adhuruesit e motokrosit dhe sporteve të ngjashme.
Në një deklaratë publike, kryetari Xheladini sqaroi se vendimi nuk është marrë nga Komuna e Dragashit dhe se ai vetë nuk ka qenë i njoftuar për një veprim të tillë nga Ministria përkatëse.
“Ky vendim është marrë nga Drejtoria e Parkut Nacional Sharri (në kuadër të Ministrisë së Mjedisit, Planifikimit Hapësinor dhe Infrastrukturës), pa ndonjë njoftim paraprak dhe pa konsultim me mua si kryetar i Komunës,” – deklaroi z. Xheladini.
Ai gjithashtu u shpreh i gatshëm të bashkëpunojë me përfaqësuesit e Shoqatës “Enduro Sharri” për të adresuar shqetësimet e tyre dhe për t’i përcjellë kërkesat e tyre zyrtare në instancat përkatëse.
“Si kryetar, do të jem zëri i qytetarëve dhe sportdashësve tanë në përpjekje për të gjetur një zgjidhje të drejtë e të pranueshme për të gjitha palët,” – përfundoi ai.
Ky reagim vjen në kohën kur komuniteti lokal ka kërkuar sqarime dhe ndërhyrje pas publikimit të vendimit të cilësuar si jopopullor.
Opojanet ka hapur kanalin në Whats App dhe ju mund të na bashkoheni për të ndjekur lajmet tona BASHKOHU KËTU.
