Kryeministri i Kosovës, Albin Kurti, shkroi pas takimit me presidentin francez, Emmanuel Macron, se Kosova është partnere e besueshme e Francës dhe e aleatëve të tjerë euroatlantik. Kurti tha se në takim u diskutua thellimi i marrëdhënieve bilaterale mes shteteve, marrëshja Kosovë-Serbi dhe zhvillimet e fundit.
Potencuam se Kosova ka propozuar kornizën e përgjithshme të marrëveshjes, ndërsa propozimi franko-gjerman shërben si bazë e mirë për diskutime të mëtejshme.
“Theksuam se Republika e Kosovës është partnere e besueshme e Republikës së Francës dhe aleatëve të tjerë euroatlantik. Falënderuam Presidentin Macron për angazhimin e Francës, në bashkëpunim me Gjermaninë, për dinamizimin e procesit të dialogut dhe ritheksuam përkushtimin e plotë të Republikës së Kosovës në këtë proces, të bazuar në ruajtjen e rendit kushtetues, sovranitetit, integritetit territorial e marrëdhënieve të mira fqinjësore”, shkroi Kurti.
Me Macronin në Paris u takua edhe presidentja e Kosovës, Vjosa Osmani. Kurti e Osmani po marrin pjesë në Forumin e Paqes në Paris. Në këtë vizitë ishte raportuar se do të kishte edhe një takim me presidentin e Serbisë, Aleksandar Vuçiq, por presidenti serb tha se “nuk beson që do të takohen”.
Opojanet ka hapur kanalin në Whats App dhe ju mund të na bashkoheni për të ndjekur lajmet tona BASHKOHU KËTU.
