Policia e Kosovës ka njoftuar për prezencën e mjegullës në rajonin e Ferizajt, e cila po paraqet rrezik për sigurinë në komunikacion, si pasojë e kushteve aktuale atmosferike.
Sipas Policisë, mjegulla është vërejtur në komunat Ferizaj, Kaçanik, Shtime, Shtërpcë dhe Hani i Elezit, veçanërisht në zonat me pozitë më të ulët gjeografike dhe në afërsi të lumenjve, duke ndikuar në uljen e dukshmërisë në rrugë.
Me këtë rast, Policia u bën apel të gjithë shoferëve që të respektojnë masat e sigurisë në trafik, duke përfshirë ndezjen e dritave të shkurtra dhe atyre të mjegullës, shmangien e përdorimit të dritave me rreze të gjata, uljen e shpejtësisë dhe mbajtjen e saj nën kontroll, si dhe qëndrimin në krahun e djathtë të rrugës.
Po ashtu, Policia këshillon rritjen e vëmendjes ndaj ndryshimeve të papritura të dukshmërisë, duke theksuar se mjegulla mund të krijojë iluzione optike dhe të ndikojë në perceptimin e shpejtësisë së lëvizjes.
“Siguria në trafik është përgjegjësi e përbashkët”, thuhet në apelin e Policisë.
Opojanet ka hapur kanalin në Whats App dhe ju mund të na bashkoheni për të ndjekur lajmet tona BASHKOHU KËTU.
