Ministri i Punëve të Brendshme, Xhelal Sveçla, ka thënë se një pjesë e kriminelëve që qëndrojnë pas sulmeve të së martës në dy komunat veriore, Zubin Potok dhe Mitrovicë e Veriut, vijnë nga radhët e policëve serbë, të dorëhequr javë më parë.
Sveçla ka thënë të mërkurën në një konferencë për media, se pavarësisht kësaj, qytetarët serbë në komunat në veri nuk i janë përgjigjur sulmeve.
“Tashmë kemi edhe të dhënat e para të mbledhura nga tereni, qoftë nga Policia e rendit, qoftë nga Inteligjenca, e cila na thotë se një pjesë e këtyre kriminelëve vijnë nga radhët e ish pjesëtarëve të Policisë së Kosovës. Edhe njëherë u dëshmua ajo që kemi thënë se konflikti dhe ndarja në këto komuna nuk është e dy etnive por nga njëra anë janë qytetarët dhe nga ana tjetër bankat kriminale ekstremiste. Qytetarët e Kosovës që jetojnë në ato komuna nuk dolën për të mbështetur kriminelët. U dëshmua edhe njëherë se qytetarët nuk përkrahën krimin”, ka thënë Sveçla.
Sipas tij, në sulmet e së martës janë përdorur shok bomba, granata dore dhe armë zjarri.
“Këtë rast Policia e Kosovës në bashkëpunim me Prokurorinë Speciale e kanë cilësuar si sulm ndaj rendit kushtetues, kryerje e veprave terroriste, zjarrvënie dhe mbajtje nën kontroll të paautorizuar të armëve”, është shprehur ministri i Brendshëm.
Ai ka bërë të ditur se situata atje tash është e qetë.
Ministri Sveçla deklaroi se Policia e Kosovës i posedon të gjitha kapacitetet e nevojshme, për t’i garantuar proceset e nevojshme në Kosovë.
“Për më shumë, normalisht që janë institucionet gjegjëse që marrin vendime. Po presim planin e KQZ-së lidhur me aktivitetet e parapara që ky proces të vejë mbarë. Në bazë të këtij plani, Policia bën vlerësime dhe rekomandime për institucionet politike vendimmarrëse, që përfundon me vendimin e presidentes”, deklaroi ai.
Të martën në Zubin-Potok dhe në Mitrovicë të Veriut, zyrtarët komunalë të zgjedhjeve dhe zyrtarët policorë, derisa kanë tentuar t’i hapin zyrat e Komisioneve Komunale Zgjedhore, janë sulmuar me shok-bomba dhe të shtëna në ajër, nga persona të panjohur. Si pasojë e kësaj atyre u është pamundësuar vazhdimi i procesit përgatitor për zgjedhjet e jashtëzakonshme në veri.
Opojanet ka hapur kanalin në Whats App dhe ju mund të na bashkoheni për të ndjekur lajmet tona BASHKOHU KËTU.
