Zyra Kombëtare e Auditimit, në raportin e saj të publikuar për pasqyrat financiare të Komunës së Dragashit për vitin 2019, ka gjetur një varg shkeljesh dhe parregullsish në lidhje me menaxhimin e pronave të paluajtshme komunale. Sipas gjetjeve të ZKA-së, një numër i madh i pronave publike të Komunës së Dragashit të cilat janë në shfrytëzim janë me kontrata të vjetra, disa prej të cilave të kontraktuara edhe para vitit 2000, ndërsa disa të tjera me kontrata të skaduara.
“Në regjistrin e Komunës së Dragashit figurojnë 104 prona/toka të cilat janë në shfrytëzim. Prej tyre një është me kontratë valide, 26 prona janë me kontrata para viteve 20006 dhe 77 prona tjera shfrytëzohen me kontrata të skaduara, që nga viti 2002 deri 2017. Edhe përkundër shkresave, njoftimeve të kohëpaskohshme dhe pajtimit të shfrytëzuesve për pagesën e borxhit, Komuna nuk ka ripërtërirë kontratat apo nuk ka kontraktime përmes proceduarve”, thuhet në raportin e auditimit të ZKA-së.
Ky institucion i ka rekomanduar Kryetarit të Komunës së Dragashit që të shtojë kontrollet lidhur më menaxhimin dhe dhënien në shfrytëzim të pronës publike komunale./Opoja.net
