Një natë historike për futbollin kosovar dhe një moment krenarie për komunën e Dragashit!
Veldin Hoxha, mesfushori i talentuar me prejardhje nga Restelica, bëri mbrëmë debutimin e tij si titullar me përfaqësuesen e Kosovës, duke lënë një gjurmë të thellë në fitoren e madhe ndaj Suedisë.
Me një paraqitje të shkëlqyer, Hoxha u dallua për shpirtin luftarak, vizionin në ndërtimin e lojës dhe elegancën teknike në çdo prekje të topit. Ai asistoi në njërin prej golave vendimtarë, duke kontribuar drejtpërdrejt në suksesin historik të “Dardanëve”.
Tifozët dhe analistët e kanë vlerësuar lart performancën e tij, duke e cilësuar si një futbollist me potencial të jashtëzakonshëm që i jep energji dhe kreativitet skuadrës. Me depërtimet e tij në mesfushë, qartësinë në pasime dhe aftësinë për të lexuar lojën, Veldini ka treguar se është gati të bëhet një pjesë e rëndësishme e së ardhmes së kombëtares.
Ky debutim nuk është vetëm një sukses personal për Hoxhën, por edhe një burim frymëzimi për të rinjtë nga Dragashi dhe mbarë Kosova — një dëshmi se me punë, përkushtim dhe pasion mund të arrihet çdo ëndërr.
Veldin Hoxha, tashmë jo vetëm një emër në futbollin kosovar, por edhe një simbol i krenarisë së Restelicës!
Opojanet ka hapur kanalin në Whats App dhe ju mund të na bashkoheni për të ndjekur lajmet tona BASHKOHU KËTU.
