15 fshatra të Komunës së Dragashit, nuk po mund të furnizohen me ujë të pijes, shkaku i parregullsive në tenderin për shtrimin e ujësjellësit.
Këto shkelje kanë filluar të bëhen qysh nga hapja e tenderit për shtrimin e ujësjellësit nga mesi i vitit 2016 e deri më tani.
Kryetari i Komunës së Dragashit Shaban Shabani, tha për KALLXO.com, se projekti i ujësjellësit është një nga projektet madhore të komunës së Dragashit që i përfshinë 15 fshatra të komunës së Dragashit dhe qytezën.
Sipas Shabanit, ky projekt nuk po mund të realizohet shkaku i pengesave gjatë procesit të tenderimit.
Kryetari fajin ia len edhe komisionit vlerësues, i cili sipas tij pas çdo vlerësimi, OSHP-ja i ka kërkuar që lëndët të rivlerësohen.
“Është projekt jashtëzakonisht i rëndësishëm që ka të bëjë me ujin e pijes në gjysmën e fshatrave të komunës sonë. Për fat të keq ka pas disa pengesa gjatë procesit të tenderimit. Komisioni që e bënë vlerësimin dhe e përzgjedh Operatorin Ekonomik që do të duhej t’i kryej punimet për momentin nuk ka rezultuar i suksesshëm për arsye që gjitha vendimet që i ka marr komisioni me kërkesë të OSHP-së është kërkuar të rivlerësohet për shkak se ka pas ankesa nga OE”, tha Shabani.
Shabani tha se as nuk po arrijnë që ta zgjedhin Operatorin Ekonomik, as nuk po iu lejohet që të anulojnë tenderin për të hapur një të ri.
“Jemi në një situatë se as nuk po mund t’i zgjedhim Operatorin Ekonomik po as nuk po arrijmë dhe s’po na lejohet të anulohet i gjithë tenderi dhe të shpallet tenderi i ri”, tha ai.
Së fundi sipas Shabanit kanë pasur një vlerësim të ri dhe iu njoftimi për kontratë iu është dhënë një Operator Ekonomik që nuk ka qenë herëve të tjera.
“Jemi në pritje të vlerësimit kemi informata që prapë do të ketë ankesa dhe do ta presim qëndrimin e fundit të OSHP-së”, theksoi Shabani.
Ndërsa, Selim Kryeziu ish kandidat për kryetar të Komunës së Dragashit nga Lidhja Demokratike e Kosovës tha se problemi i këtij tenderi është histori në komunën e tyre.
Ai dyshon se komuna përpiqet që tenderin tua jap kompanive të caktuara ndaj të cilave ka borxhe.
“Problem i ujit më mirë është ta quajmë historia e ujit në komunën tonë. Mendoj se arsyeja që ky tender anulohet është fakti se komuna ka borxhe ndaj kompanive të ndryshme dhe përpiqet t’ia jep një kompanie të caktuar dhe jo asaj që i plotëson kushtet e kriteret. Janë 15 fshatra që presin ujë nga ai ujësjellës dhe është e pa hijshme dhe e pa ndershme që për hir të kompanive të caktuara ti lësh gjitha këto fshatra pa ujë”, tha Kryeziu.
Në muajin nëntor të këtij viti, Komuna e Dragashit ka bërë njoftimin për dhënie të kontratës në tenderin Ujësjellësi kryesor-Vazhdim i punimeve (Projekt tre vjeçar).
Grup i Operatorëve Ekonomik të cilët iu është dhënë kontrata është NPN “ALFA-ING” dhe ” AL – TRADE ” SH.P.K me vlerën e përgjithshme e kontratës 1.282.701,55 euro.
Por, ky tender nuk do të përmbyllet me këtë njoftim, pasi serish ka ankesë në OSHP. Rasti do të trajtohet në Organin Shqyrtues të Prokurimit, duke u zvarritur ky projekt që është nisur për herë të parë në vitin 2016. OSHP-ja disa herë kishte gjetur shkelje ligjore të bëra nga Komuna e Dragashit në këtë tender.
Para njoftimit për kontratë, Organi Shqyrtues i Prokurimit kishte lëshuar një urdhëresë ndaj Komunës së Dragashit me të cilën lëndën paraprake autoriteti kontraktues e kishte anuluar.
Gazeta Jeta në Kosovë, vazhdimisht ka shkruar për dështimet e këtij tenderi.
Në nëntor të vitit 2017, Gazeta Jeta në Kosovë, kishte shkruar se Komuna e Dragashit për disa herë me radhë është dashur ta mbrojë vendimin e saj para panelit të Organit Shqyrtues të Prokurimit (OShP).
Projekti për shtrimin e rrjetit të ujësjellësit ka nisur për herë të parë në qershor të vitit 2016 ende nuk është finalizuar. Pas disa tentimeve, kjo komunë kishte vendosur që të anulonte procesin e prokurimit duke e rishpallur tenderin e ri me disa ndryshime të vogla në projekt.
Në dy tenderë të ndryshëm, por për punën e njëjtë, Komuna e Dragashit ka bërë shkelje ligjore duke e zvarritur zgjerimin e rrjetit të ujësjellësit në disa fshatra.
