Trajneri i Barcelonës, Hansi Flick, ka konfirmuar se Robert Lewandowski do të rikthehet në fushë nga stoli për ndeshjen e kthimit në gjysmëfinalen e Ligës së Kampionëve kundër Interit të martën mbrëma.
Sulmuesi polak ka munguar në katër ndeshjet e fundit për shkak të një dëmtimi në gju, por ka marrë dritën jeshile për të luajtur, pasi kaloi testet mjekësore të hënën.
“Lewandowski po ndihet mirë. Fola me të dje dhe është më mirë sesa kemi pritur. Do të jetë i disponueshëm nga stoli, nëse kemi nevojë për të,” tha Flick para stërvitjes së fundit të skuadrës në Milano.
Kjo lë të kuptohet se Ferran Torres pritet të nisë nga minuta e parë si qendërsulmues, njësoj si në ndeshjen e parë.
Shumica e diskutimeve kanë qenë rreth mbrojtjes së Barcelonës. Me Jules Kounde jashtë, pritet që Eric Garcia ta zëvendësojë në të djathtë. Ndërkohë, me Alejandro Balde ende të padisponueshëm, Flick duhet të vendosë për krahun e majtë.
Gerard Martin pati vështirësi kundër Denzel Dumfries në ndeshjen e parë, por mbetet zgjedhja më natyrale. Gjithashtu ka spekulime se Íñigo Martínez mund të spostohet në të majtë, duke lënë vendin në qendër për Ronald Araújo.
“I kemi analizuar të gjitha me stafin. Duhet të mbrohemi më mirë dhe mund të ketë disa ndryshime. Kaq mund të them. Mund të jetë ide e mirë të shmangim dhënien e goditjeve nga këndi. Nuk kemi pasur kohë të punojmë mbi këtë, por lojtarët e dinë detyrën e tyre,” tha Flick.
“Dëmtimet nuk mund të kthehen pas. Kounde dhe Balde janë mungesa të rëndësishme, por Eric, Héctor Fort, Araújo dhe Gerard do të japin gjithçka.”
Ndërkohë, trajneri i Interit Simone Inzaghi ka lavdëruar sërish Lamine Yamal, i cili shkëlqeu në ndeshjen e parë, por Flick nuk heziton të flasë hapur për yllin 17-vjeçar:
“Lamine është një gjeni, në këtë moshë është e pabesueshme çfarë bën me topin. Çdo pasim ka peshën dhe këndin perfekt. Por për mua, ekipi është më i rëndësishëm.”
Sipas raportimeve më të fundit, Flick thuajse e ka vendosur formacionin për sfidën ndaj Interit, por mbrojtja mbetet dilema kryesore
Opojanet ka hapur kanalin në Whats App dhe ju mund të na bashkoheni për të ndjekur lajmet tona BASHKOHU KËTU.
