Sot në Komunën e Dragashit u lansua zyrtarisht projekti edukativo-sportiv “Biçikleta – Mjeti i Aventurës, Shëndetit dhe Zhvillimit të Turizmit”, i iniciuar nga Klubi i Çiklizmit “Opoja”, në bashkëpunim me Drejtorinë për Kulturë, Rini dhe Sport, si dhe Drejtorinë e Arsimit.
Ky projekt ka për qëllim të vetëdijësojë nxënësit për përfitimet e shumta të biçikletës në krahasim me mjetet tjera të transportit, duke nxitur një stil jetese më të shëndetshëm, të qëndrueshëm dhe aktiv – me theks të veçantë në potencialin e turizmit malor në Dragash.
Ligjëratat e para u mbajtën sot në tri shkolla fillore: SHFMU “28 Nëntori” në Bresanë, Shkolla “Ulina” në Kosavë dhe Shkolla “Sezai Surroi” në Bellobrad. Para nxënësve ligjëroi z. Ahmet Kamberi, një nga anëtarët themelues të Klubit të Çiklizmit “Opoja”, i cili trajtoi rëndësinë e biçikletës si mjet ekologjik dhe sportiv. Bashkë me të ishte edhe z. Arlind Salihu, po ashtu pjesë e brezit të parë të klubit.
Televizioni Opoja raporton se gjatë këtyre ligjëratave u trajtuan temat që lidhen me ndikimin pozitiv të biçikletës në shëndetin fizik dhe mendor, si dhe potenciali që ajo ofron për zhvillimin e turizmit lokal dhe mbrojtjen e mjedisit.
Në këtë aktivitet morën pjesë edhe drejtoresha e DKRS-së, znj. Liridona Misini Piraj, dhe shefi i kabinetit të kryetarit të komunës, z. Veton Halili, të cilët e përkrahën fuqishëm këtë nismë. Drejtuesit e shkollave pjesëmarrëse u shprehën të kënaqur dhe e mirëpritën projektin me entuziazëm.
Ligjëratat do të vazhdojnë edhe në shkollat tjera të Komunës së Dragashit, si pjesë e një strategjie më të gjerë për të kultivuar te të rinjtë dashurinë për sportin, natyrën dhe një mënyrë jetese aktive.
Opojanet ka hapur kanalin në Whats App dhe ju mund të na bashkoheni për të ndjekur lajmet tona BASHKOHU KËTU.
