Në kuadër të agjendës së aktiviteteve për shënimin e 12 Qershorit – Ditës së Çlirimit të Dragashit, sot është mbajtur Seanca solemne e Kuvendit të Komunës, ku morën pjesë udhëheqësit lokalë, përfaqësues të familjeve të dëshmorëve dhe të OVL-së së UÇK-së, përfaqësues të institucioneve fetare, të sigurisë, arsimit, media dhe qytetarë të shumtë.
Mysafirë të veçantë në këtë seancë ishin kryetari i Komunës së Mavrovës dhe Rostushës nga Maqedonia e Veriut, z. Medat Kurtovski, kryesuesja e Kuvendit të kësaj komune, znj. Teuta Mirto, dhe nënkryetari, z. Kenan Elezi. E pranishme ishte gjithashtu edhe Qytetarja e Nderit e Komunës së Dragashit, znj. Janet Reineck.
Kryesuesja e Kuvendit të Komunës së Dragashit, znj. Arijeta Skeraj, në fjalën e saj uroi qytetarët për këtë ditë të shënuar, duke theksuar se liria e fituar 26 vjet më parë ishte rezultat i sakrificës së bijve dhe bijave më të mirë të vendit. Ajo përmendi rolin vendimtar të Ushtrisë Çlirimtare të Kosovës, mbështetjen e bashkësisë ndërkombëtare dhe unitetin e popullit në këtë rrugëtim të lavdishëm.
Kryetari i Komunës, z. Xheladini, falënderoi të gjithë të pranishmit për pjesëmarrjen në këtë seancë solemne dhe uroi qytetarët me rastin e Ditës së Çlirimit, duke e cilësuar këtë datë si një nga më të rëndësishmet në historinë e re të vendit. Ai theksoi se kjo ditë është simbol i fitores mbi padrejtësinë dhe shtypjen sistematike të regjimit serb.
Në këtë seancë me fjalë përshëndetëse u paraqitën edhe përfaqësuesi i OVL-së së UÇK-së, z. Salih Shala, përfaqësuesi i familjeve të dëshmorëve, z. Sherif Sylejmani, si dhe nënkryetari nga radhët e komuniteteve, z. Fejsal Halilović.
Pas përfundimit të seancës, u organizuan homazhe te shtatorja e Komandantit Legjendar Adem Jashari, te Varrezat e Dëshmorëve në Dragash dhe Buqe, si dhe te Pllaka përkujtimore e dëshmorit turk, Husein Kutlu.
Aktivitetet festive vijuan me koncert në sheshin e qytetit dhe garën tradicionale të vrapimit të kuajve në Mejdan të Opojës, të organizuara nga Drejtoria për Kulturë, Rini dhe Sport në bashkëpunim me Shoqërinë Kulturore Artistike “Bresana” dhe Klubin e Kuajve “Opoja”.
Dragashi sot kremtoi me krenari dhe respekt për historinë, duke nderuar të kaluarën dhe festuar lirinë.
Opojanet ka hapur kanalin në Whats App dhe ju mund të na bashkoheni për të ndjekur lajmet tona BASHKOHU KËTU.
