Presidenti i FFK-së, Agim Ademi ka reaguar pas vdekjes së hershme të gazetarit të mirënjohur sportiv, Milaim Krasniqi, i cili sot mbylli sytë përgjithmonë në Francë ku ndodhej për trajtim shëndetësor.
Në telegramin e ngushëllimit dërguar familjes Krasniqi dhe Shoqatës së Gazetarëve Sportivë të Kosovës, Ademi thekson se Mili ishte zëri simbol i radiotransmetimeve të futbollit për më shumë se tri dekada. Ishte pjesë e çdo suksesi të klubeve tona, por edhe i Kombëtares së Kosovës.
Telegram i plotë
Prishtinë, 16 dhjetor, 2022
E nderuara Familje Krasniqi!
Të nderuar drejtues dhe anëtarë të SHGSK-së!
Me pikëllim të thellë e morëm lajmin për ndarjen nga jeta të më të dashurit tuaj Milaim Krasniqi, ndaj ju lutem më lejoni që në emrin tim, të KE të FFK-së, klubeve, futbollistëve dhe tërë komunitetit të futbollit, të ju shpreh ngushëllimet më të thella dhe më të sinqerta.
Milaim Krasniqi i dha shumë gazetarisë sportive e bashkë me të edhe futbollit të Kosovës. Ai ishte zëri kumbues i futbollit kosovar që nga ditët e para të pasluftës nëpërmjet valëve të radios.
Ai nisi me radiotransmetime në Radion Kosova e Lirë, për të vazhduar më pas në Radio Rilindja dhe për të vazhduar traditën e transmetimeve në Radio Kosova, aty ku punoi deri në ditët e fundit të jetës së tij.
Mili ishte zëri simbol i radiotransmetimeve të futbollit për më shumë se tri dekada. Ishte pjesë e çdo suksesi të klubeve tona, por edhe i Kombëtares së Kosovës.
Ai ishte përplot pozitivitet e vizion. Ishte i lindur për të qenë komentator sporti. Mënyra se si e përçonte emocionin e një ndeshje futbolli tek dëgjuesit e radios ishte sa e veçantë, por aq e papërsëritshme. Thjesht ishte mjeshtër i mikrofonit.
Ikja e tij e hershme nga kjo botë është një humbje e madhe për familjen, miqtë dhe për gazetarinë sportive.
Ai pas vetës la një arkiv të pasur radiotransmetimesh, emisionesh e spektaklesh sportive e argëtuese. Milaimi ishte i gjithanshëm, intelektual e me virytete të larta.
Në këto momente të vështira qëndrojmë afër familjes Krasniqi dhe tërë kolegëve e miqve të tij.
I lehtë i qoftë dheu i Kosovës!
Me pikëllim të madh,
Agim Ademi, president i FFK-së
Opojanet ka hapur kanalin në Whats App dhe ju mund të na bashkoheni për të ndjekur lajmet tona BASHKOHU KËTU.
