Dorëheqja e Prokurorit shtyn gjykimin e Kryetarit të Dragashit

Kushtrim Guraj Kushtrim Guraj Lajme Opoja

Gjykimi i kryetarit të Dragashit Salim Jenuzi është shtyrë për shkak të dorëheqjes së prokurorit Sefer Morina.Në këtë proces gjyqësor Salim Jenuzi bashkë me dy zyrtarë komunalë-Behan Haxhihasanin e Vetim Hasanin akuzohen për shpërdorim detyre, ndërsa Nexhat Selaj ngarkohet për uzurpim të pronës shoqërore.
Prokurori Genc Nixha që pas dorëheqjes së Sefer Morinës e mori përsipër përfaqësimin e kësaj lënde, kërkoi shtyrjen e seancës për t’u përgatitur më mirë për të.

“Pasi që kemi të bëjmë me një çështje që është mjaft komplekse dhe duhet kohë për t’u përgatitur, besoj në mirëkuptimin tuaj edhe të pandehurve dhe kolegut tim avokat për shtyrjen e kësaj seance që kjo të shtyhet në një afat të arsyeshëm”, kërkoi prokurori Nixha.

Të pandehurit dhe mbrojtja u pajtuan me propozimin e prokurorit, ndërsa trupi gjykues mori aktvendim me të cilin e shtyu këtë seancë gjyqësore.

Seanca e radhës do të mbahet me 18 maj 2017.

Salim Jenuzi akuzohet se nga viti 2009 deri në vitin 2016 në Dragash me qëllim të fitimit të dobisë pasurore për tjetrin dhe shkaktimin e dëmit komunës ia mundësoi pronarit të furrës “Evropa”, Nexhat Selajt, përvetësimin e kësaj patundshmërie.

Në pronën shoqërore Selaj më pas kishte ndërtuar objekt dykatësh pa vendim të asamblesë në Dragash, ndërsa këtë gjë nuk e kishin penguar drejtori i Urbanizmit në këtë komunë Behan Haxhihasani dhe inspektori komunal i ndërtimtarisë Vetim Hasani.

Salim Jenuzi vite më parë ishte akuzuar për një rast tjetër të keqpërdorimit të detyrës zyrtare, por në janar të vitit të kaluar u shpall i pafajshëm nga Gjykata Themelore në Prizren.

/OPOJAnet/

Opojanet ka hapur kanalin në Whats App dhe ju mund të na bashkoheni për të ndjekur lajmet tona BASHKOHU KËTU.

- Reklama-
- Reklama-