Një arritje e rëndësishme për mjekësinë kosovare është shënuar nga Dr. Selam Sylejmani, i cili ka përfaqësuar Kosovën si ligjërues i ftuar në një nga ngjarjet më të rëndësishme ndërkombëtare në fushën e gjinekologjisë dhe obstetrikës.
Bëhet fjalë për kongresin AFGO 1st International Congress, i organizuar nën moton “Shaping the Future through Innovation and Impact in Gynecology, Obstetrics and Neonatal Care”, ku morën pjesë mbi 20 ligjërues ndërkombëtarë nga vende të ndryshme si Italia, Greqia, Mali i Zi, Maqedonia e Veriut, Rumania dhe Shqipëria.
Në këtë kongres prestigjioz, Dr. Selam Sylejmani prezantoi ligjëratën me temë:
“Diagnostikimi i hershëm i shtatzënisë ektopike – Një ekzaminim, një vendim jetik që shpëton jetë.”
Kjo temë trajton një nga sfidat më të rëndësishme në mjekësi, duke theksuar rëndësinë e diagnostikimit të hershëm për të shpëtuar jetën e nënës.
Si shenjë respekti dhe vlerësimi për kontributin e tij profesional dhe shkencor, Dr. Sylejmani u nderua me titullin “Honorary Member” nga kryetari i AFGO-së, një vlerësim që dëshmon për nivelin e lartë të përfaqësimit dhe ekspertizës së tij.
Në reagimin e tij publik, ai e cilësoi këtë përvojë si një nder të veçantë, duke theksuar se ky vlerësim nuk është vetëm personal, por edhe një nder për Kosovën dhe për punën e vazhdueshme të profesionistëve shëndetësorë në vend.
Ky sukses përbën një moment krenarie për komunitetin mjekësor në Kosovë dhe dëshmi se profesionistët kosovarë po kontribuojnë dhe po vlerësohen gjithnjë e më shumë në arenën ndërkombëtare.
Opojanet ka hapur kanalin në Whats App dhe ju mund të na bashkoheni për të ndjekur lajmet tona BASHKOHU KËTU.
