Forcës së Sigurisë së Kosovës (FSK) i janë bashkuar 350 rekrutë të rinj në një ceremoni të mbajtur në qytetin e Ferizajt, transmeton OpojaNet.
Presidentja e Kosovës, Vjosa Osmani, e cila njëherësh është edhe Komandante Supreme e FSK-së, tha se 350 ushtarë të rinj morën rrugën në shërbim të FSK-së.
“Nga këta djem dhe vajza në uniform, një zë i fuqishëm jehon: për Kosovën”, tha Osmani.
Sipas presidentes Osmani, fuqia e ushtrisë kosovare po rritet dhe Republika e Kosovës po ecën përpara me krenari.
Pjesë e ceremonisë së diplomimit të rekrutëve ishte edhe kryeministri në detyrë, Albin Kurti, i cili tha se në katër vitet e fundit në ushtri janë investuar 300 milionë euro dhe mbi 2.700 ushtarë e oficerë të rinj janë rekrutuar.
Në ceremoninë e certifikimit morën pjesë udhëheqës të lartë shtetërorë, oficerë e nënoficerë të Ministrisë së Mbrojtjes dhe Forcës së Sigurisë së Kosovës.
Opojanet ka hapur kanalin në Whats App dhe ju mund të na bashkoheni për të ndjekur lajmet tona BASHKOHU KËTU.
