Sonte do të zhvillohet ndeshja finale e Ligës së Kampionëve, ku do të ndeshen Tottenham dhe Liverpool, të dy këto ekipe nga Premier Liga angleze e futbollit. Politologu Fitim Salihu ka publikuar në profilin e tij në Facebook një detal interesant nga historia shumëvjeçare e Ligës së Kampionëve.
“Kosovari i parë që ka luajtur në një finale të Ligës së Kampionëve ka qenë Fahrudin Jusufi, goran i lindur më 8 dhjetor 1939 në fshatin malor të Zlipotokut, rrëzë Sharrit të Dragashit. Ai ka luajtur që si 16 vjeç si mbrojtës i Partizanit të Beogradit”, ka shkruar Fitim Salihu.
Salihu ka zbuluar se Fahrudin Jusufi ka luajtur në finalen e 11 majit të vitit 1966, me ekipin e Partizanit të Beogradit kundër Real Madridit, ku ky i fundit i kishte mposhtur me rezultat 2:1.
Sipas politologut Fitim Salihu, kur Fahrudin Jusufi ishte pyetur në vitin 1991 nga një revistë sportive në Beograd “nëse situata politike në Kosovë po i shkaktonte probleme, Fahrudini do të përgjigjej: ‘Përse do të kisha probleme? Unë jam goran, nëse iu intereson ta dini.’ ”/Opoja.net/
Postimi i plotë i Fitim Salihut në Facebook:
“Kosovari i parë që ka luajtur në një finale të Ligës së Kampionëve ka qenë Fahrudin Jusufi, goran i lindur më 8 dhjetor 1939 në fshatin malor të Zlipotokut, rrëzë Sharrit të Dragashit. Ai ka luajtur që si 16 vjeç si mbrojtës i Partizanit të Beogradit.
11 majin e vitit 1966, në Stadiumin “Hejsel” të Brukselit, skuadra e tij zhvilloi finalen kundër Realit të Madridit, pasi që më parë e kishin eliminuar Mançester Junajtidin në gjysmëfinale. Ndonëse jugosllavët kaluan të parët në epërsi, gjigantët spanjollë e fituan finalen me rezultat 2:1.
Pos Jusufit, në po këtë finale luajti edhe një kosovar tjetër – portjeri e kapiteni i Partizanit, Milutin Shoshkiqi, malazez i lindur në Jabllanicë të Pejës.
Pas një dekade në Partizan me 162 ndeshje të luajtura, Jusufi do të transferohej në Bundesligë tek Ajntraht Frankfurti ku gjatë katër viteve zhvilloi 111 ndeshje, duke e arritur suksesin më të madh në vitin 1967 me pozitën e katërt në Bundesligë.
Jusufi ka qenë edhe reprezentues i Jugosllavisë në 55 takime, duke luajtur ndër të tjera edhe në Botërorin “Kili ’62”. Në Evropianin “Francë ’60” shkoi gjer në finale, ku u mposht nga Bashkimi Sovjetik 2:1. Kësisoj, ai ishte edhe kosovari i parë që luajti një finale të Kampionatit Evropian. Në Lojërat Olimpike “Romë ’62” ai e përjetoi edhe një finale me Reprezentacionin jugosllav, të cilën e fitoi 3:1 kundër Danimarkës.
Pas penzionimit, Fahrudin Jusufi u bë trajner i Shalkes në Gjermani në vitin 1980-81, gjersa më vonë e drejtoi edhe skuadrën bavareze “1860 Munich” dhe Partizanin e Beogradit.
Tani, në moshën 79 vjeçare, ai jeton në Beograd. I pyetur në vitin 1991 nga revista sportive beogradase, “Tempo”, nëse situata politike në Kosovë po i shkaktonte probleme, Fahrudini do të përgjigjej: “Përse do të kisha probleme? Unë jam goran, nëse iu intereson ta dini.”
Opojanet ka hapur kanalin në Whats App dhe ju mund të na bashkoheni për të ndjekur lajmet tona BASHKOHU KËTU.
