Qytetarë të Prizrenit dhe Dragashit, kërkojnë që urgjentisht të mbyllet deponia e mbeturinave të ngurta në dalje të Zhurit në rrugën që shpie për Dragash.
Në këtë deponi po hedhen në vend të mbeturinave të ngurta dhe konstruksioneve ndërtimore, kafshë dhe eshtra të tyre që po rezultojnë me erë tejet të keq , ndërsa nuk mund të përjashtohet mundësia e përhapjes së ndonjë epidemie të mundshme.
Deponia e hapur para disa vitesh në Zhur e destinuar për hudhjen e mbeturinave të ngurta është shndërruar në deponi të egër, në të cilën po hudhen nga persona të pandërgjegjshëm kafshë të ngordhura dhe eshtra të tyre, me ç’rast shpërndahet një erë tejet e rëndë dhe e keqe si e cila në masë të madhe po e ndot edhe ambientin.
Deponia ndodhet buzë rrugës Prizren – Dragash, ku banorët e këtyre komunave nga kundërmimi i erës së keqe nuk guxojnë as dritaret e veturave t’i hapin. Mixhen Berisha, Abidin Maksuti dhe Zaim Berisha, për gjendjen në këtë deponi janë tejet të shqetësuar. Këta qytetarë kërkojnë angazhim të menjëhershëm të institucioneve, të cilat sipas tyre janë përgjegjëse direkte për këtë gjendje.
Disa nga ata kërkojnë edhe mbyllje të kësaj deponie, sepse sipas tyre nuk përjashtohet mundësia e përhapjes së ndonjë epidemie që askush nuk do ta deshironte. Lidhur me këtë temë, ne jemi orvatur të kontaktojmë zyrtarë të komunës së Prizrenit, por një gjë e tillë ka qenë e pamundur. Deri më tani gjendja e kësaj deponie nuk është ngritur si shqetësim nga përfaqësuesit e institucioneve , shoqërisë civile, përfshirë edhe shoqata të ndryshme ambientale, të cilat aktivitetet sensibilizuese i organizojnë vetëm në sheshin Shatërvan.
