Blerim Reqicës, nga fshati Softaj i Ferizajt, i ngordhën dy lopë, përshkak të pakujdesisë së Agjencisë së Ushqimit dhe Veterinës. Ato nuk ishin vaksinuar kundër sëmundjes gungore pavarësisht gjendjes së rëndë në të cilin ishin.
“I kanë vaksinu disa. E gjashtë tjera thanë se skanë nevojë”, tregon fermeri që u desh të paguaj 15 euro veterinerin për t’ia lëshuar një vërtetim se lopa ishte e sëmurë.
Veterineri bashkë me inspektorin e komunës do të duhet të konstatojnë ngordhjen për t’i mundësuar Reçicës të hyjë në listë për kompenzim të kafshëve.
Ky shërbim është ofruar pa pagesë që kur sëmundja gungore ishte shfaqur në Kosovë.
Por, Gazeta Fjala mëson se Oda e Veterinerëve ka vendosur të ngarkoj fermerët me pagesë pasi që zyrtarisht ka përfunduar fushata e vaksinimit nga Agjencia e Veterinës dhe Ushqimit në Kosovë.
Ky nuk është rasti i vetëm.
Veterineri që ka sfiduar Agjencinë dhe kolegët e tij gjatë tërë procesit, Fazli Shabani tregon se një rast konkret ka ndodh në Komunën e Lipjanit në fshatin Llugaxhi.
“Personat nuk ja kanë vaksinu lopën fermerit, e kanë anashkalu. Tash veq i ka ngordh lopa. Ka shumë raste që nuk ua kanë vaksinu lopët, prej frikës se jan të smuta i kanë lënë pa vaksinu”, tregon Shabani.
Këto dy raste bëhen publike pas raportimit të Gazetës Fjala, rreth dyshimeve për keqpërdorimin e tenderit një million eurosh AUV, mbi vaksinimin e kafshëve të sëmura.
AUV e OVK ia hedhin fajin njëra-tjetrës
Mirëpo për Agjencinë e Ushqimit dhe Veterinës, procesi i vaksinimit të kafshëve ka shkuar siç është më së miri.
Në përgjigjet që kanë dhënë për Gazetën Fjala, thuhet se gjithë procesi i vaksinimit është mbuluar nga AUV, derisa thonë se tashmë ka përfunduar e gjithë fushata për vaksinimin e kafshëve.
“Vaksinimi masiv i kafshëve të llojit të gjedhit kundër Sëmundjes Gungore te Lëkurës – LSD ka përfunduar me date 10.10.2016. Subjektet veterinare private të kontraktuara nga AUV kanë realizuar vaksinimin ne teren te kafshëve kundër sëmundjes LSD pagesa për këtë shërbim do të mbulohet nga AUV përmes buxhetit shtetëror. Ndërsa për fermer vaksinimi ka qene falas”, tregon për Gazetën Fjala, Lamir Thaqi, zyrtar për informim në AUV.
Në anën tjetër, veterinari Fazli Shabani, përgënjeshtron deklaratat e zyrtarëve të AUV-it, se procesi i vaksinimit ka shkuar në rregull. Sipas tij pa vaksinuar kanë mbetur edhe shumë kafshë .
“Vaksinimi nuk ka shkuar në rregull edhe përshak se AUV, ka dërguar në terren persona jo të specializuar për atë punë. Ata nga frika se po gabojnë kanë lënë kafshët e sëmura pa vaksinuar, derisa të njejtat kanë ngordhur pas disa ditësh”, shpjegon veterineri Shabani.
Oda e Veterinerëve, nuk i sqaron pagesat
Në Odën e Veterinerëve, nuk sqarojnë përse fermerët po i obligojnë me pagesa tani kur ka përfunduar fushata dhe jo edhe gjatë fushatës së vaksinimit.
Ndërkohë përshkak të raportimit të mëhershëm të Gazetës Fjala, rreth dyshimeve për keqpërdorimin e tenderit nga AUV, drejtori i Odës së Veterinerëve të Kosovës, Xhevdet Krasniqi, ka dhënë përgjigje të përgjithësuara rreth rastit.
Gazeta Fjala ka kërkuar sqarime nga OVK, se gjatë kohës sa ka zgjatur vaksinimi, kontrollet e kafshëve, diagnostifikimet e konstatimet, nga kush janë mbuluar si dhe pse po ngarkohen fermerët me pagesa, ndërsa në përgjigjet që kemi marrë nga Kryetari i OVK-së, nuk shihet se është dhënë ndonjë sqarim për pyetjet që kemi kërkuar.
“Sa u përket pyetjeve të parashtruara, ju njoftoj se gjatë fushatës së vaksinimit, veterinarët paguhen nga AUV për aplikimin e vaksinës dhe matrikulimin e kafshëve. Të gjitha shërbimet veterinare tjera paguhen nga pronari i kafshës”, përgjigjet shkurt, Krasniqi. /Gazeta Fjala/
