Krerët shtetërorë përkujtojnë 146 vjetorin e Lidhjes së Prizrenit

Opoja.net Opoja.net Kosova

Lidhja e Prizrenit, si organizim politik, ushtarak e ideologjik sipas krerëve shtetërorë paraqet përpjekjen më serioze të vënies së themelit për krijimin e shtetit shqiptar, mbi të cilën bazë më vonë është shpallur edhe pavarësia e Kosovës.

Në ceremoninë e shënimit të 146 vjetorit të Lidhjes Shqiptare të Prizrenit, presidentja e Kosovës Vjosa Osmani ka theksuar se duke kombinuar organizimin gjithëkombëtar politik e luftarak, kjo Lidhje, paraqet organizimin kulmor për çlirimin e trojeve shqiptare dhe mbrojtjen e tyre nga cdo kërcënim dhe pretendim i vendeve të tjera. Sipas saj sikurse shpallja e pavarësisë së Shqipërisë edhe shpallja e pavarësisë së Kosovës e kanë burimin ndër të tjera tek historiku i Lidhjes së Prizrenit.

“Prandaj, Lidhja e Prizrenit mbetet e gravuar përgjithmonë në mendjet dhe zemrat e secilit shqiptar, si testament i natyrshëm i shpirtit të kombit tonë”, ka thënë Osmani. Por njëkohësisht ka përkujtuar se ashtu siç përsëritet historia, përsëriten edhe tendencat. “Në këtë kohë të trazuar për kontinentin tonë ambiciet shoveniste serbe sërish janë në skenë, me apetite që nuk i kemi parë në këto 25 vite. Prandaj përballë rreziqeve të mëdha të sigurisë, uniteti ynë do të shërbej si forcë për të mbrojtur shtetin tonë nga tendencat shoviniste të Serbisë fqinje”, ka deklaruar Osmani.

Kryetari i Kuvendit të Kosovës, Glauk Konjufca ka shprehur qëndrimin se Lidhja e Prizrenit paraqet aksionin e parë politik dhe ideologjik të shqiptarëve ndoshta që nga koha e Kuvendit të Lezhës, e cila promovon interesin e shqiptarëve si një komb unik.

“Lidhja e Prizrenit është themeli mbi të cilin është ndërtuar ngrehina e pavarësisë sonë kombëtare.  Ajo nxiti, mobilizoi dhe i mbajti gjallë të gjitha kryengritjet shqiptare deri në realizimin e pavarësisë së Shqipërisë”, ka thënë Konjufca.

Ngjashëm edhe kryeministri i Kosovës, Albin Kurti ka pohuar se Lidhja shqiptare e Prizrenit paraqet ngjarjen historike kur gjatë pjesës së dytë të shekullit XIX janë vënë themelet e formimit të shtetit shqiptar.

“Kjo është hera e parë në histori kur shqiptarët po flisnin me një zë, pa dallim krahine e feje, duke shprehur kërkesën themelore e universale për vetëvendosje dhe për mbrojtjen e ruajtjen nga copëtimi i territoreve të banuara me shqiptarë”, ka deklaruar Kurti, duke shtuar se kjo ngjarje historike ka qenë gurthemel i përpjekjeve të shqiptarëve për pavarësi, që më pas u kurorëzua me datat e 28 nëntorit 1912 me shpalljen e pavarësisë së Shqipërisë e 96 vite më pas, me 17 shkurt 2008, me shpalljen e pavarësisë së Kosovës, “duke realizuar kësisoj një pjesë të programit të Lidhjes që nuk u arrit të plotësohet në vitin 1912”.

Më 10 qershor të vitit 1878, Kuvendi i Përgjithshëm i Lidhjes Shqiptare të Prizrenit pati filluar punimet, me ç’rast ishte ngritur zëri kundër copëtimit të tokave shqiptare, derisa në mbledhjen e përgjithshme ishte vendosur që të krijohet një organizatë me karakter politik e ushtarak, me qendër drejtuese në Prizren dhe me degët përkatëse në krahinat e ndryshme shqiptare. Në këtë mënyrë sipas historianëve lindi “Besëlidhja” (itifak) që më vonë u quajt “Lidhja Shqiptare” ose “Lidhja e Prizrenit”. Organizata politiko-ushtarake e LSHP-së në luftë e sipër u shndërrua në një organizëm shtetëror me administratën, ushtrinë, dikasteret dhe territorin e saj, prandaj dhe gëzon statusin e ngjarjes së rëndësishme në historinë e përpjekjeve të popullit shqiptar për liri dhe pavarësi kombëtare.

Gjatë ditës përvjetori i 146-të i LSHP-së, në qytetin e vjetër është shënuar edhe me aktivitete tjera.

/OPOJAnet/

Opojanet ka hapur kanalin në Whats App dhe ju mund të na bashkoheni për të ndjekur lajmet tona BASHKOHU KËTU.

- Reklama-
- Reklama-