Aleanca Kosova e Re, bashkë me partnerët e koalicionit LDK-LD-Alternativa (LALA), ka hapur fushatën sot edhe në Dragash, ku partnerët e koalicionit prezantuan programin qeverisës, kandidatin për kryeministër si dhe kandidatët për deputetë në Kuvendin e Republikës së Kosovës.
Në ketë tubim lideri i Aleancës Kosova e Re, Behgjet Pacolli, ju bëri thirrje qytetarëve që ta votojnë koalicionin e shpresës dhe kandidatin për kryeministër nga radhët e koalicionit Avdullah Hoti, bëhet e ditur përmes një komunikate për media.
Pacolli tha se koalicioni i shpresës ofron kuadro që do të punojnë me dinjitet dhe profesionalizëm. Ai ka shtuar se koalicioni i shpresës nuk do ta zhvat dhe keqpërdorë asnjëherë pasurinë e qytetarëve të Kosovës.
“Ne do te shkojmë, krah për krah, së bashku me partnerët tanë dhe qytetarët e Kosovës dhe t’i plotësojmë kërkesat e tyre për një jetë të sigurt e me perspektivë”, ka thënë ai.
Pas fjalës së tij para qytetarëve Pacolli iu bëri thirrje atyre që ta votojnë kandidaten e listës e cila vjen nga ky rajon, Albena Reshitaj.
Ndërsa kandidati i koalicionit LDK- AKR -LD-Alternativa, për kryeministër Avdullah Hoti, ju bëri thirrje qytetarëve që t’i përkrahin njerëzit e punës e të nderit, të cilët janë bërë bashkë për ta formuar qeverinë më të mirë që do të ketë Kosova.
