Federata e Automjeteve Historike të Kosovës ishte mysafire e TOSES, të apasionuarit pas këtyre makinave nga komuna jonë në rallyn e dytë turistik, i cili u mbajt në lokacionin Prizren–Bellobrad–Opojë. Ky aktivitet mblodhi entuziastët e makinave historike nga e gjithë Kosova në një udhëtim të veçantë, duke përshkuar një rrugë prej 25 kilometrash përmes peizazheve të mahnitshme të komunës së Dragashit.
Pjesëmarrësit, të apasionuar pas automjeteve të vjetra—të njohura ndryshe si “oldtimers”—patën mundësinë të eksplorojnë disa nga fshatrat më të bukura të Opojës, duke përjetuar jo vetëm kënaqësinë e vozitjes me këto makina unike, por edhe magjinë natyrore që ofron ky rajon. Rruga e rallyt kaloi përmes panoramave të gjelbra, duke ofruar një eksperiencë të paharrueshme për të gjithë pjesëmarrësit.
Në përfundim të udhëtimit, grupi u mblodh pranë liqenit të Breznës, ku kaluan momente të bukura në një atmosferë të relaksuar, duke shijuar natyrën dhe duke ndarë përvoja mbi pasionin e tyre për automjetet historike. Ky rally jo vetëm që solli bashkë komunitetin e adhuruesve të makinave klasike, por gjithashtu promovoi potencialin turistik të komunës së Dragashit, duke dëshmuar se ky rajon është një destinacion ideal për aktivitete të tilla.
Opojanet ka hapur kanalin në Whats App dhe ju mund të na bashkoheni për të ndjekur lajmet tona BASHKOHU KËTU.
