Kryeministri i Shqipërisë, Edi Rama, i ftuar ditën e sotme më 25 mars në emisionin “Opinion” diskutoi mbi temat e aktualitetit shqiptar.
Ai bëri të ditur se kompania e cila do të sjellë në Shqipëri fabrikën e prodhimit të vaksinave është e njëjta që shërbeu si distributor për vaksinën kineze.
“Keymen Ilaç Sanayi ve ticaret” është distributor i autorizuar nga firma kineze Sinovac.
“Ne kemi realizuar një marrëveshje më prodhuesin turk e cila prodhon disa lloj vaksinash, unë i kam kërkuar që ata të vijnë në Shqipëri të hapin një fabrikë tyre”, tha Rama.
Ndër të tjera, ai shtoi se, shteti është gati të subvenciojë një pjesë.
Kryeministri më herët e cilësoi investimin për fabrikën si “të rëndësishëm, jo vetëm për këtë moment, por edhe për të ardhmen”.
Sipas tij, kjo do të hapë një faqe tjetër në sektorin e shëndetësisë, duke qenë një pikë referimi për prodhime të cilësisë së lartë.
Tom Doshi dhe Ambasada Amerikane
Lidhur me deklaratat e ambasadores amerikane, Yuri Kim, për mospërfshirjen në kuvend të deputetit Tom Doshi, Rama u shpreh se Partia Socialiste nuk është dhe nuk do jetë aleate me Doshin.
“Së pari vetë ambasadorja më parë ka komunikuar për publikun atë që i kam thënë. Së dyti nuk kemi asnjë dallim me ambasadoren dhe së treti, unë dhe ne, kemi ndërkohë një target më të gjerë se sa thjesht individi për të cilin flasim”, shpjegoi Rama.
Ai e cilësoi Doshin si “engjëll përpara Saliut, Ilirit dhe Monikës”.
Albanianpost.com