Trajneri i Gjilanit mungoi kundër Trepçës ’89 shkaku i helmimit, shtrihet në një spital në Shkup

Kushtrim Guraj Kushtrim Guraj Sport

Përkundër shumë problemeve nga brenda që po përballet Gjilani muajve të fundit, për klubin nga Anamorava së fundmi është shfaqur edhe një problem i ri.

Gjegjësisht, përkohësisht, Gjilani ka mbetur pa trajner për shkak të gjendjes shëndetësore të Zekirija Ramadanit.

Ramadani mungoi në seancën e fundit stërvitore të Gjilanit në prag të ndeshjes së fundjavës ndaj Trepçës ’89 në “Riza Lushta”, ndeshje që u mbyll baras 1:1.

Zyrtari i Gjilanit, Drilon Sylejmani ka zbuluar për FrontOnline arsyen e mungesës së Ramadanit, për të cilin thotë se është helmuar.

Trajneri shkupjan ndodhet tash në një spital në Shkup, derisa është në gjendje stabile.

“Trajneri Zekirija Ramadani ka munguar në seancën e fundit stërvitore para ndeshjes dhe në ditën e lojës me Trepçën ‘89 për shkak të një helmini”, tha Sylejmani duke vazhduar:

“Ka qëndruar dy ditë në Gjilan, ndërsa më pas hospitalizimin e ka vazhduar në Shkup”.

Tutje, ai tregon se për gjendjen e Ramadanit “nuk ka asgjë për t’u shqetësuar”.

“Ndodhemi në kontakt të vazhdueshëm me trajnerin dhe gjendja e tij shëndetësore është e mirë tani dhe nuk ka asgjë për t’u shqetësuar”, deklaroi të martën për portalin Drilon Sylejmani.

Ndryshe, pas 13 javësh në elitën e futbollit kosovar, Gjilani ndodhet në vendin e katërt në tabelë me 19 pikë të tubuara.

/OPOJAnet/

Opojanet ka hapur kanalin në Whats App dhe ju mund të na bashkoheni për të ndjekur lajmet tona BASHKOHU KËTU.

- Reklama-
- Reklama-