Të dhënat e publikuara nga Komisioni Qendror i Zgjedhjeve tregojnë se deri në orën 15:00 në procesin zgjedhor kanë votuar rreth 22 për qind e qytetarëve me të drejtë vote, bazuar në përpunimin e 97.88 për qind të vendvotimeve në vend.
Shifrat tregojnë një rënie të dukshme të pjesëmarrjes krahasuar me zgjedhjet e mëparshme parlamentare. Në zgjedhjet e mbajtura më 28 dhjetor, deri në të njëjtën orë kishin votuar rreth 29 për qind e votuesve, duke shënuar afërsisht shtatë pikë përqindjeje më shumë se këtë herë.
Një situatë e ngjashme ishte regjistruar edhe në zgjedhjet parlamentare të 9 shkurtit të vitit të kaluar, kur deri në orën 15:00 pjesëmarrja kishte arritur në 28.65 për qind.
Pavarësisht ritmit më të ngadaltë të votimit gjatë pjesës së parë të ditës, autoritetet zgjedhore kanë bërë të ditur se procesi po zhvillohet pa pengesa dhe se qendrat e votimit po funksionojnë normalisht në të gjithë vendin.
Mbetet të shihet nëse orët e mbetura deri në mbylljen e vendvotimeve do të sjellin një rritje të pjesëmarrjes dhe do të ngushtojnë diferencën me zgjedhjet e kaluara.
Opojanet ka hapur kanalin në Whats App dhe ju mund të na bashkoheni për të ndjekur lajmet tona BASHKOHU KËTU.
