Kombëtarja e Kosovës ka nisur sot përgatitjet për dy ndeshjet e fundit të fazës së grupeve në Ligën e Kombeve.
“Dardanët” janë grumbulluar në mëngjes, ndërsa pasdite kanë zhvilluar stërvitjen e parë në Kampin Nacional në Hajvali.
Sipas njoftimit të Federatës së Futbollit të Kosovës, në stërvitje kanë marrë pjesë 15 futbollistë, derisa pjesa tjetër e ekipit ka qëndruar në palestrën e hotelit për rigjenerim.
FFK-ja ka bërë të ditur se atmosfera në kamp është shumë e mirë dhe se futbollistët po punojnë me përkushtim për dy sfidat e radhës.
Ndeshjen e parë Kosova do ta zhvillojë të shtunën ndaj Izraelit, në stadiumin “Fadil Vokrri”, me fillim nga ora 15:00.
Tri ditë më vonë, më 17 nëntor, “Dardanët” do të udhëtojnë për t’u përballur me Irlandën, në ndeshjen e fundit të Grupit 3 të Ligës B.
Pas katër ndeshjeve të zhvilluara, Kosova ka pesë pikë dhe renditet në pozitën e dytë, aq sa ka edhe Irlanda në vendin e tretë. Austria kryeson grupin me tetë pikë, ndërsa Izraeli ka dy pikë.
Opojanet ka hapur kanalin në Whats App dhe ju mund të na bashkoheni për të ndjekur lajmet tona BASHKOHU KËTU.
