Agjërimi për personin tjetër

PYETJE:

Një grua tek ne vuan
nga skleroza e shumëfishtë – sëmundje shumë e rëndë. Ajo aktualisht ndihet mirë
dhe jeton jetë normale. Por, ajo i ka humbur (nuk i ka agjëruar) disa ramazana
për shkak të shtatzënisë, sëmundjes etj. Në fakt, mjekët e kanë këshilluar atë se
duhet të jetojë jetë më të mirë dmth. të ushqehet më mirë, të pushojë etj.,
sepse simptoma e tjetër, pas simptomës fillestare, mund të shfaqet në çdo kohë
dhe ta godasë cilindo funksion të trupit – t’ia pamundësojë ecjen, të folurit
etj.

Një fqinje e saj,
shumë e devotshme, është ofruar që (vullnetarisht) të agjërojë për të, kurse
burri i saj po pyet se a ka mundësi që ai të japë fidje për të, në mënyrë që
ajo të mos e dëmtojë trupin e saj duke e kompensuar atë periudhë, as mos rrezikojë
e t’i përkeqësohet sëmundja.

PËRGJIGJE:

Agjërimi është detyrim personal dhe askush nuk mundet të agjërojë për dikë tjetër. Në rastin e përmendur, pasi kemi të bëjmë (sipas mjekësisë së sotme) me sëmundje të pashërueshme, dhe personi nuk është në gjendje të agjërojë, në këtë rast, fidja është dispozita alternative. Ju këshillojmë që të konsultoheni me mjekun tuaj, për mundësinë eventuale për agjërimin e ditëve të humbura, dhe nëse nuk ka mundësi, atëherë le të ndajë fidjen.

Muftiu i Sarajevës, Dr. Enes Ljevakoviç

Fetve-i emini i Akademisë për Fetva pranë BI të Bosnjës

Përktheu: Miftar Ajdini

(Islampress)