Drejtoria e Arsimit në Dragash, sot e ka shpallur fituesen e konkursit për mësim klasor në Shkollën Fillore të Mesme të Ulët “Ilmi Bahtijari”, në fshatin Zaplluxhë.
Fituese është shpallur Shahindere Ramadani, e cila drejtor do ta ketë vjehrrin e saj, ndërsa babai i saj ishte ish-drejtor i Arsimit në komunë.
Disa ditë para se të shpallej rezultati përfundimtar, gazeta JnK ka pranuar ankesë nga një kandidate me pretendimin që ky konkurs është planifikuar për të rehatuar nusen e drejtorit të shkollës, familja e të cilës ka lidhje politike me Partinë Demokratike të Kosovës që edhe e udhëheq këtë komunë.
Kandidatja e cila nuk ka dashur t’i bëhet emri publik, tha për gazetën JnK, se Shahindere Ramadani e cila e ka fituar konkursin është e reja (Gruaja e të birit) e drejtorit të shkollës Naser Meleqi dhe se babai i saj Hajri Ramadani ka qenë ish drejtor i Arsimit në komunë mandatin e kaluar.
“Ka pas edhe më të mirë në konkurs. Përderisa e ka vjehrrin drejtor të shkollës, babain ish drejtor të arsimit kjo na lë me dyshu që me ndikime politike ka arrit të del e para në rezultate”, tha ajo.
Pas këtyre pretendimeve, gazeta ka kontaktuar me fituesen e konkursit, Shahindere Ramadani.
Ajo nuk i ka mohuar pretendimet e palës ankuese duke thënë se babai i saj ka qenë ish-drejtor i Arsimit dhe se vjehrri i saj është drejtor i shkollës ku ka konkurruar. Ajo tha se edhe babai edhe vjehrri kanë lidhje politike me PDK-në.
Ndërsa, ka treguar edhe shkollimin e saj.
“E kam përfundu Fakultetin e Edukimit, programin fillor në Universitetin e Prishtinës”, tha ajo.
Por, lidhjet politike me PDK-në nuk i ka pranuar vjehrri i saj Naser Meleqi.
Ai pasi e konfirmoi që Shahindere Ramadani është nusja e djalit të tij, tha se ka qenë kryetar i degës së AAK-së në Dragash, subjekt i cili është në koalicion qeverisës me PDK-në.
Sa i përket konkursit Meleqi tha se nuk ka ndikuar në punësimin e nuses së djalit të tij.
“Me Shahindere Ramadani kam lidhje familjare është nusja e djalit tim. Konkursi është hap pasi me 24 prill shkon në pushim të pleqërisë një punëtor i kësaj shkolle. Unë kam qenë kryetar i degës së AAK-së në Komunën e Dragashit”, tha ai.
Gazeta ka kontaktuar edhe me drejtorin e Arsimit në Komunën e Dragashit, Vloran Cenaj.
Ai tha për gazetën JnK, se konkursi është hapur në bazë të kërkesave për rekrutim duke treguar se një punëtor shkon në pension dhe se pozita e tij duhet të zëvendësohet.
“Konkursi është hap në bazë të kërkesave për rekrutim. Dikush ka shkuar në pension dhe tash është hap vend i punës për mu zëvendësuar”, tha Cenaj duke mohuar se konkursi është hapur për të rehatuar familjaren e drejtorit.
Ndryshe, Kandidatët e pakënaqur me rezultatet e shpallura, mund të bëjnë ankesë me shkrim në DKA -Komisionin për ankesa, brenda 8 ditëve nga data e shpalljes së këtij Vendimi.
Opojanet ka hapur kanalin në Whats App dhe ju mund të na bashkoheni për të ndjekur lajmet tona BASHKOHU KËTU.
