Federata e Futbollit e Kosovës (FFK) ka bërë të ditur se presidenti i FIFA-s, Gianni Infantino, ka uruar futbollin kosovar me rastin e 10-vjetorit të anëtarësimit në organizatën më të madhe të futbollit botëror.
Në një postim në rrjetin social Instagram, Infantino ka vlerësuar zhvillimin e futbollit në Kosovë gjatë dekadës së fundit, duke theksuar ndikimin pozitiv që ky sport ka pasur te të rinjtë dhe tifozët.
“Presidenti i FIFA-s, Gianni Infantino ka uruar Federatën e Futbollit të Kosovës me rastin e 10-vjetorit të anëtarësimit në shtëpinë e futbollit botëror. Në një postim të publikuar në profilin e tij në Instagram, Infantino vlerësoi progresin e futbollit kosovar gjatë dekadës së fundit, duke theksuar rritjen dhe ndikimin pozitiv që futbolli ka pasur te gjeneratat e reja dhe tifozët në vend. ‘Përgëzime Federatës së Futbollit të Kosovës për kremtimin e 10 viteve si federatë anëtare e FIFA-s. Gjatë dekadës së kaluar, futbolli në Kosovë ka vazhduar të rritet dhe të frymëzojë shumë lojtarë të rinj dhe tifozë’, ka shkruar Infantino.
Ai po ashtu theksoi përkushtimin e vazhdueshëm të FIFA-s për zhvillimin e futbollit në Kosovë, duke kujtuar kontributin e ish-presidentit të FFK-së, Fadil Vokrri, si dhe punën e presidentit aktual Agim Ademi.
‘FIFA mbetet e përkushtuar në mbështetjen e zhvillimit të lojës në Kosovë, i cili fillimisht u mbikëqyr nën udhëheqjen e Fadil Vokrrit dhe vazhdon edhe sot nga Agim Ademi dhe ekipi i tij’, thuhet më tej në mesazhin e presidentit të FIFA-s”, ka komunikuar FFK.
Kosova ishte pranuar zyrtarisht në FIFA më 13 maj të vitit 2016.
Opojanet ka hapur kanalin në Whats App dhe ju mund të na bashkoheni për të ndjekur lajmet tona BASHKOHU KËTU.
