Në Komunën e Dragashit, e cila shtrihet në skajin më jugor të Kosovës, me rreth 34 mijë banorë rezident, 30 përqind e të cilëve të komunitetit boshnjak, është duke menduar seriozisht për zgjedhjet e rregullta lokale të këtij viti.
Në disa subjekte politike është hapur debati për kandidatin për kryetar, ndërsa në disa të tjera pritet të hapet së shpejti. Dega e PDK-së e cila udhëheq me Komunën e Dragashit, ende nuk e ka hapur debatin për kandidatin për kryetar të Komunës.
Sekretari i Degës së PDK-së në Dragash Avni Nebiu, mohon të kenë diskutuar për kandidatin e mundshëm për kryetar. “Jo”, tha shkurt ai. I pyetur nëse dega e PDK-së do t’ia kërkojë edhe një mandat kryetarit aktual të Dragashit, i cili njëherësh është edhe kryetar i Degës, Salim Jonuzit, Nebiu tha shkurt “Nuk e di,vendos kryesia e partisë. Është statuti dhe është e paraparë procedura se si propozohet dhe zgjidhet kandidati i Degës për kryetar komune”.
Ndonëse në Degën e PDK-së pohohet se debati nuk është hapur, sipas opinionit në këtë komunë, janë tre kandidatë të mundshëm. Salim Jonuzi përmendet si kandidat i mundshëm, por përflitet se ai nuk do ta pranojë sfidën edhe për një mandat. Ndërsa, si kandidatë më potencial përmenden Lulzim Rifaj dhe kryesuesi i Kuvendit Komunal, Shaban Shabani.
Ndryshe nga PDK-ja, në Degën e LDK-së kanë filluar diskutimet për përzgjedhjen e kandidatit me të cilin kjo parti do të përfaqësohet në zgjedhjet lokale. Selim Kryeziu kryetar i Degës, pohon se në mbledhjen e fundit të mbajtur me 26 shkurt e ka hapur këtë temë. “Meqenëse askush deri tani nuk ka paraqitur kandidaturë, ose as në opinion nuk kam dëgjuar se dikush ka shprehur ambicie, unë e kam hapur këtë temë në mbledhje dhe kam kërkuar që ata që kanë ambicie ta shprehin hapur brenda strukturës. Më shumë se kaq, kam kërkuar nga anëtarët e kryesisë edhe ide se kush mund të jetë kandidati më i mirë”, tha Kryeziu për Gazeta e Re.
LDK, sipas Kryeziut, do ta ketë kandidatin që do t’i fitojë zgjedhjet lokale. “Jam unë si kryetar i Degës apo një tjetër nuk është fare me rëndësi. Me rëndësi është fitorja e LDK-së”, u shpreh ai
Përveç kryetarit të Degës, Selim Kryeziut, si kandidat i mundshëm i LDK-së për kryetar komune lakohet edhe emri i Bexhet Xheladinit.
Edhe Dega e AAK-së do ta ketë kandidatin për kryetar të Komunës. Si kandidatë të mundshëm përflitet Selami Saiti, ndërsa thuhet se ambicie ka shfaqur edhe Hajriz Meleqi.
As Dega e NISMA-s për Kosovën nuk ka përzgjedhur ende personin që do të përfaqësojë strukturat e partisë. Megjithëkëtë, Fatmir Halili nga kjo parti nuk e mohon se mund të jetë kandidat për këtë pozitë. “Personalisht, nuk e mohoj që mund të jem kandidat nga radhët e kësaj partie, megjithatë, si edhe më parë, vendimet i marrim pas debatit që zhvillojmë me strukturat e Degës dhe nëndegës dhe vendos Kryesia”, tha Halili . Për dallim nga subjektet tjera në Dragash, nuk lakohet ndonjë emër tjetër që do të dalë si kandidat nga NISMA.
Ndërkaq, emrin e kandidatit për kryetar, për Gazeta e Re e bën të ditur Aleanca Kosova e Re. “Absolutisht po do ta kemi kandidatin për kryetar të Komunës sepse krejt Kosova, dhe më së shumti Komuna e Dragashit, ka nevojë për ndryshim të qeverisjes lokale. Kandidati potencial i AKR-së është kryetari i Degës Zaim Hajredini”, tha Muhidin Jusufi, sekretari i Degës së AKR-së në Dragash.
E një grup i aktivistëve të Lëvizjes Vetëvendosje po tentojnë ta ribëjnë qendrën e kësaj lëvizjeje në këtë komunë. Koordinatori i kësaj qendreje Azdren Shala, pohon se Qendra e lëvizjes Vetëvendosje për momentin, më të rëndësishëm e ka riorganizimin. “Po tentojmë me pas kandidatin për kryetar”, shprehet Shala.
Për dallim nga komunat tjera, në jug të Kosovës një kandidat i pavarur e ka paralajmëruar kandidaturën. Në një postim në Facebook, Hamdi Muhameti ka paralajmëruar kandidimin për kryetar në zgjedhjet lokale. Ai u është drejtuar qytetarëve të Dragashit me këtë mesazh. “Ju njoftoj se, në zgjedhjet e ardhshme lokale do të konkurroj si kandidat i pavarur për Kryetar të Komunës së Dragashit, me ç’rast, do të prezantoj projektin për ndryshim, zhvillim dhe ardhmëri të Komunës sonë” shkruan Muhameti.
Edhe partitë politike boshnjake janë duke u përgatitur për zgjedhjet lokale, edhe pse ende nuk e dinë në do të kenë kandidatë për kryetar të komunës. Sipas praktikave të deritashme, partitë politike boshnjake kanë konkurruar vetëm me lista të kandidatëve për Kuvendin Komunal, por jo edhe me kandidatë për kryetar Komune./Gazetaere.com/Opoja.net/
