Të premten janë hapur edhe tre nënstacione të zjarrfikësve në komunën e Prizrenit. Zhuri, Gjonaj dhe Reçani, tashmë janë bërë me objekte të zjarrëfikësve.
Me rastin e hapjes së nënstacioneve të reja të zjarrfikësve, ceremonia qendrore është organizuar në Zhur, ku në prani të drejtuesve të komunës së Prizrenit dhe institucioneve tjera e banorëve të këtij lokaliteti, është bërë hapja e këtij nënstacioni.
Kryetari i komunës, Mytaher Haskuka, tha se që nga fillimi i mandatit , prioritet i është dhënë fuqizimit të Njësisë së Brigadës së Zjarrfikësve në Prizren, gjë që tashmë po shndërrohet në realitet me hapjen e këtyre nënstacioneve dhe ngritjes së kapaciteteve të kësaj Njësie. Drejtori për Emergjenca dhe Siguri, Faruk Dakaj, tha se ditën e zjarrfikësve të Prizrenit, po e shënojmë suksesshëm me hapjen e këtyre nënstacioneve të reja, dhe gëzon fakti se kjo gjë ndikon edhe në dyfishimin e numrit të zjarrfikësve që do të angazhohen në nënstacionet e reja.
Ditë të rëndësishme për Prizrenin me hapjen e nënstacioneve të reja të zjarrfikësve, e vlerësoi edhe kryeshefi ekzekutiv i AME-së, Fadil Kodra.
Ndryshe, objektet e këtyre nënstacioneve janë ndërtuar para disa kohësh, por për arsye të panjohura, është vonuar hapja e tyre.
