Sipas Il Corriere dello Sport, Interi preferon Marcos Alonson në krahasim me Emerson Palmierin dhe mund të kërkojë që ta përfshijë atë në një marrëveshje shkëmbimi për Achraf Hakimin.
Reprezentuesi i Marokut duket se është në prag të largimit nga Stadio Meazza me PSG-në dhe The Blues të interesuar për të siguruar shërbimet e tij.
Nerazzurrët duhet të shesin një nga yjet e tyre për të mbajtur bilancin pozitiv financiar dhe çmimi i kërkuar për ish-anësorin e Real Madridit dhe Borussia Dortmundit është 80 milionë euro.
Si Chelsea ashtu edhe PSG besohet të kenë bërë një ofertë rreth 60 milionë, e cila ende nuk është e mjaftueshme për Nerazzurrët.
Sipas disa raportimeve, Interi nuk është i gatshëm për të shitur Hakimin në një marrëveshje shkëmbimi, lojtar, plus para, por Il Corriere dello Sport sugjeron që drejtorët e Nerazzurrve mund të ndryshojnë mendim nëse Chelsea i ofron Marcos Alonson.
Ish-anëtari i Fiorentinës raportohet të jetë opsioni i preferuar i Interit për krahun e majtë, madje edhe përpara Emerson Palmierit.
Është ende e paqartë nëse Chelsea do të ishte i hapur për të përfshirë mbrojtësin e majtë spanjoll në marrëveshjen Hakimi, por ata me siguri janë në dispozicion për ta bërë këtë me lojtarë të tillë si Tammy Abraham, Mateo Kovacic dhe Davide Zappacosta. /Telegrafi/
