Ushtarët italianë të Komandës Rajonale Perëndim, në kuadër të misionit të KFOR-it të udhëhequr nga NATO-ja, kanë zhvilluar patrullime të rregullta me automjete dhe në këmbë në Prizren.
Sipas njoftimit të KFOR-it, këto aktivitete i mundësojnë misionit të mbajë prani të dukshme dhe të vazhdueshme në rajon, si dhe ta monitorojë nga afër situatën e sigurisë në terren.
KFOR-i tha se patrullimet pasqyrojnë angazhimin e tij të vazhdueshëm për të kontribuar në një mjedis të sigurt dhe në garantimin e lirisë së lëvizjes për të gjithë qytetarët e Kosovës.
Misioni i NATO-s theksoi se vazhdon ta zbatojë mandatin e tij, bazuar në Rezolutën 1244 të Këshillit të Sigurimit të Kombeve të Bashkuara, në mënyrë të paanshme dhe në koordinim të ngushtë me Policinë e Kosovës dhe Misionin e Bashkimit Evropian për Sundimin e Ligjit në Kosovë – EULEX.
Opojanet ka hapur kanalin në Whats App dhe ju mund të na bashkoheni për të ndjekur lajmet tona BASHKOHU KËTU.
