Shkencëtarët britanikë po testojnë një ilaç të ri që mund të parandalojë që dikush që preket nga koronavirusi të zhvillojë sëmundjen Covid-19. Ekspertët thonë se ky ilaç mund të shpëtojë shumë jetë. Terapia me antitrupa do të jepte imunitet të menjëhershëm kundër sëmundjes dhe mund të jepet si një trajtim urgjent për pacientët e shtruar në spital, por edhe për ata që kanë pasur kontakt me dikë të infektuar.
Dr Catherine Houlihan, një virologe në University College London Hospitals NHS, tha:
“Nëse ne mund të provojmë se ky trajtim funksionon dhe parandalojmë njerëzit që janë të ekspozuar ndaj virusit të zhvillojnë Covid-19, do të ishte një shtesë emocionuese për arsenalin e armëve që po zhvillohen për të luftuar këtë virus të tmerrshëm”.
Ilaçi është zhvilluar nga UCLH dhe AstraZeneca, kompania farmaceutike që gjithashtu, së bashku me Universitetin e Oksfordit, kanë krijuar një vaksinë që pritet të miratohet për përdorim në Britani javën e ardhshme.
Ekipi shpreson që prova të tregojë se kokteji i antitrupave mbron nga Covid-19 për rreth 6-12 muaj. Pjesëmarrësit në test e marrin atë si dy doza, njëra pas tjetrës. Mund të jetë në dispozicion sa më shpejt, që në mars ose prill nëse miratohet nga rregullatori i ilaçeve pasi të ketë shqyrtuar provat nga studimi.
“Deri më sot kemi injektuar 10 pjesëmarrës – personel, studentë dhe njerëz të tjerë – të cilët ishin të ekspozuar ndaj virusit në shtëpi, në një mjedis të kujdesit shëndetësor ose salla studentore”, -tha Houlihan.
Ajo dhe kolegët do të ndiqnin nga afër pjesëmarrësit për të parë se cili prej tyre zhvillon Covid-19.
“Avantazhi i këtij ilaçi është se ju jep antitrupa të menjëhershëm”, tha Houlihan, “ndryshe nga vaksinat që nuk japin imunitet të plotë për rreth një muaj”.
Paul Hunter, një profesor i mjekësisë në Universitetin e Anglisë Lindore i cili specializohet në sëmundjet infektive, tha se trajtimi i ri mund të zvogëlojë ndjeshëm numrin e të vdekurve nga Covid-19.
Pritet të shihet nëse provat do të jenë efektive, por është e rëndësishme që çdo trajtim i ri të hulumtohet plotësisht, të vëzhgohet dhe, më e rëndësishmja, të jetë i sigurt para se të përdoret.
Opojanet ka hapur kanalin në Whats App dhe ju mund të na bashkoheni për të ndjekur lajmet tona BASHKOHU KËTU.
