Athina më në fund bëhet me një xhami

Linda Guraj Linda Guraj Artikuj

Xhamia e parë në kryeqytetin grek, Athinë, është hapur pas 14 vjet grindjesh dhe vonesash burokratike, njoftoi media lokale.

Sipas Al Jazeera, përcjell Telegrafi, lutjet përuruese të xhamisë u mbajtën të hënën në mbrëmje nën masat e distancës fizike për shkak të rritjes së numrit të rasteve me COVID-19 në Greqi, si në pjesën më të madhe të Evropës.

Vetëm një numër i vogël njerëzish ishin në gjendje të merrnin pjesë.

Me hapjen, Athina “ndryshoi statusin e saj si kryeqyteti i vetëm i Bashkimit Evropian që ka mungesë të një xhamie”, njoftoi Anadolu Agency.

Imami i parë i xhamisë është Zaki Mohammed, 49 vjeç, një qytetar grek me origjinë marokene, tha e përditshmja greke Ekathimerini.

Hapja e xhamisë “dërgon një mesazh të qartë … të demokracisë, lirisë fetare dhe respektit”, u citua nga gazeta Kathimerini sekretari qeveritar për çështje fetare, Giorgos Kalantzis.

Ndryshe, kundërshtimi nga Kisha Ortodokse Greke kishte vonuar hapjen e xhamisë që nga viti 1979. U deshën vite edhe pasi qeveria dha dritën jeshile për hapjen e saj në vitin 2006.

Por vendimi i vitit 2006 për të ndërtuar një xhami me një buxhet prej 1.04 milion dollarë u bllokua nga pengesa burokratike, protesta nga grupe të ekstremit të djathtë dhe sfida ligjore.

Shumica dërrmuese e grekëve, 97 për qind, janë të krishterë ortodoksë. Sidoqoftë, ekziston një pakicë myslimane e përqendruar përgjatë kufirit tokësor me Turqinë dhe dhjetëra mijëra punëtorë dhe refugjatë myslimanë jetojnë në vend.

(Telegrafi)

/OPOJAnet/

Opojanet ka hapur kanalin në Whats App dhe ju mund të na bashkoheni për të ndjekur lajmet tona BASHKOHU KËTU.

- Reklama-
- Reklama-