Brodi, një fshat i veçantë për të kaluar vikendin

Në malet e Sharrit të radhitur një pas një si trekëndësha, hasim në një fshat me natyrë shumë të bukur.

Është ky fshati Brod në komunën e Dragashit ku kalojnë tre lumenjë dhe i japin një pamje edhe më të veçant këtij vendi të rrethuar me male.

Rrugët e ngushta, shtëpitë prej gurit dhe natyra shumë e bukur e ka bërë Brodin mjaft të vizituar.

Ky fshat ka 560 shtëpi ndërsa të lë përshtypje arkitektura që daton prej vitit 1912-të, janë ndërtime tradicionale Osmane.

Eshtë një vend me tradita të vjetra i banuar nga shqiptarët dhe goranët.
Blegtoria është puna që ata bëjnë më së shumti, pothuajse secila shtëpi ka kope të mëdha delesh.

Brodi, si fshati më i zhvilluar i kësaj komune, që ka qenë qendër për tregti ende ka shumë kuaj të cilët mund t’i vërejmë se janë në masë më të madhe sesa veturat.

Kuajt e bardhë vetëm sa i shtojnë bukurinë fshatit.

Në bukuritë e këtyre bjeshkëve do të mund të kaloni një vikend shumë të mirë dhe të qetë.

Në lartësin 1550 metra gjenden edhe restorante të ndryshme.

Hotel Argjena është njëri prej hoteleve më të njohur në këtë vend.

Ky hotel mund të akomodojë më shumë se 100 persona, ndërsa çmimet fillojnë nga 20 euro e më lartë.

Kush ka pasur mundësinë që ta vizitojë Brodin, pa dyshim se është kthyer i mrekulluar nga mikëpritja e banorëve.

Ndërsa duke e ditur që nga këto treva kemi djathin e cilësisë më të lartë në vend, ju nuk mund të ikni pa një kuti djath Sharri me vete, të dhuruar nga ndonjë fshatarë.

Sot fshati Brod njihet nga turistët si një vend me shtigje të gjata për ecje dhe frekuentohet mjaft si nga të huajt por edhe nga grupe të ndryshme nga Kosova e rajoni.

© Opoja.net. Të gjithë të drejtat e mbrojtura.