Organizata Finch, organizatë kjo për mbrojtjen e zogjve dhe natyrës, gjatë ditës ka shpërndarë ushqim për zogj nëpër disa pjesë specifike të qytetit të Prizrenit. Kjo Organizatë tashmë e ka bërë traditë që gjatë stinës së dimrit në bashkëpunim me institucionet dhe donatorë të ndryshëm të shpërndajnë ushqim për zogj. Kryetari i Shoqatës Finch, Nexhmedin Ramadani për Gazeta e Re thotë se në këtë të ftohtë dhe borë të madhe që ka rënë në Kosovë janë të rrezikuar edhe zogjtë e natyrës.
“Edhe zogjtë janë rrezikuar në këtë acar të dimrit të fortë. Bora që ka rënë i ka mbuluar ushqimet dhe tani ne e kemi radhën, që të iu ndihmojmë zogjve. Apeloj te qytetarët e gjithë Kosovës që tu ndihmojnë këtyre krijesa, që të shpërndajnë ushqim edhe nëpër oborret e tyre. Bukën dhe ushqimet tjera zogjtë në fluturim e shohin dhe ndalen për tu ushqyer”.
Ramadani thotë se natyra është mbuluar me petkun e bardhë dhe zogjtë zbresin rreth e qark qyteteve dhe fshatrave dhe vijnë edhe nëpër oborret tona për të kërkuar ushqim.
“Unë shpresoj që në këto ditë të ftohta me minus 15 gradë celsius deri në minus 20, të dalim jashtë shtëpive tona dhe të ua shtrijmë dorën duke shpërndarë ushqim për zogjtë. Ne e dimë cilat vende i frekuentojnë zogjtë dhe në këto vende shpërndajmë ushqim. Për shembull këtu afër Lumëbardhit, veç kanë ardhur pulëbardhat. Aty ku ka ujë, aty ku është toka e hapur, ku nuk ka borë, ku ka shkelur këmba e njeriut apo rrota e makinës që e ka shtyp borën, aty janë vendet që frekuentohen nga zogjtë”
Ai njofton se ky aktivitet për shpërndarjen e ushqimit do të vazhdojë edhe të dielën, kur aktivistët e Shoqatës Finch bashkë me shoqatën e gjuetarëve do të shpërndajnë ushqim në bregun e Drinit të Bardhë, ndërsa gjatë javës së ardhshme do të angazhohet rinia në një aktivitet më të madh për shpërndarjen e ushqimit.
Organizata Finch fton donatorët që ta ndihmojnë këtë organizatë me ushqim për zogjtë./Gazetaere.com/
Opojanet ka hapur kanalin në Whats App dhe ju mund të na bashkoheni për të ndjekur lajmet tona BASHKOHU KËTU.
