Mblidhet Shtabi Emergjent në Dragash, shqyrton situatën me Covid-19

Merlinda Guraj Merlinda Guraj Opoja

Sot ka mbajtur mbledhjen e radhës Shtabi Emergjent në Dragash, ku ka shqyrtuar gjendjen e krijuar nga pandemia në këtë komunë. Në njoftimin e publikuar mbi mbledhjen e mbajtur është theksuar se situata pandemike në Dragash është nën kontroll.

“Kjo nuk është një arsye për relaksim, por për të punuar edhe më shumë në ruajtjen e shëndetit të të gjithë banorëve të komunës sonë”, thuhet  në njoftimin e Komunës së Dragashit.

Sipas të dhënave të publikuara nga mbledhja e Shtabit Emergjent, në Dragash deri më tani janë infektuar gjithsej 177 persona. Raste aktive aktualisht janë 32. Ndërsa 22 persona në Dragash nuk kanë arritur që ta fitojnë betejën me koronavirusin.

Më poshtë e keni njoftimin e plotë nga mbledhja e Shtabit Emergjent:

“Situata në Komunën e Dragashit është nën kontroll, u tha në seancën e Shtabit Emergjent.

Sot, në Komunën e Dragashit u mbajt një takim i rregullt i Shtabit të Situatave Emergjente, në të cilin u diskutua situata që u krijua pas rritjes së numrit të pacientëve me koronavirus në Kosovë, si dhe në Komunën e Dragashit.

Në fjalën e tij hyrëse, Kryetari i Komunës Shaban Shabani informoi anëtarët e Shtabit Emergjent për situatën aktuale që u krijua pas rritjes së vazhdueshme të numrit të personave të infektuar në Kosovë si dhe rritjes së numrit të personave të infektuar nga Komuna e Dragashit.

Përkundër situatës së vështirë në Kosovë, në komunën e Dragashit, situata tani për tani është nën kontroll, theksoi kryetari i komunës, Shaban Shabani. Komuna jonë është në zonën e gjelbër. Siç e dini, komunat me një numër të madh të njerëzve të infektuar janë në zonën e kuqe. Ne kemi një numër shumë më të vogël të të infektuarve sesa komunat e tjera në Kosovë. Kjo nuk është një arsye për relaksim, por për të punuar edhe më shumë në ruajtjen e shëndetit të të gjithë banorëve të komunës sonë. Ai u bëri thirrje të gjitha institucioneve që t’i përmbahen në mënyrë rigoroze të gjitha rekomandimeve të Institutit Kombëtar të Shëndetit Publik, si dhe Ministrisë së Shëndetësisë.

Drejtori i Drejtorisë së Shëndetësisë, Behar Brenoli dhe Drejtori i Qendrës për Mjekësi Familjare informuan anëtarët e Shtabit Emergjent në detaje për situatën në kujdesin shëndetësor si dhe numrin e të të infektuarve dhe të të vdekurve.

Drejtori i Qendrës së Mjekësisë Familjare në Dragash, Ramadan Jashari, theksoi se deri më tani, gjithsej 177 persona janë infektuar që nga fillimi i pandemisë në komunën tonë, nga të cilët 32 janë aktivë dhe kemi pasur 22 vdekje.

Ai kërkoi që policia dhe inspektimi të përfshihen më aktivisht në monitorimin e personave që duhet të jenë në izolim.”

/OPOJAnet/

Opojanet ka hapur kanalin në Whats App dhe ju mund të na bashkoheni për të ndjekur lajmet tona BASHKOHU KËTU.

- Reklama-
- Reklama-