Si asnjëherë më parë, fshatin Zgatar e karakterizon një qetësi pothuajse absolute. Pos mbjelljes së tokave të tyre bujqësore, aty nuk zhvillohen aktivitet e tjera që e karakterizojnë këtë fshat në rrethana normale.
Por, ajo çfarë ka mbetur si më parë, është liria e këtyre kuajve të cilët kishin ardhur nga fshati Bresanë.
Banorët e kësaj ane, gjatë muajit prill me këta kuaj e realizojnë lojën e famshme “Vrapimi i kuajve”, lojë kjo që është kthyer tashmë në traditë.
Mirëpo në këtë pranverë, këta kuajt nuk do të angazhohen në asnjë aktivitet.
Këtë e ka pamundësuar pandemia Covid-19.
E si pasojë e kësaj, banorët këtu kanë vetëm një aktivitet, atë të mbjelljes së pemëve e perimeve. Ata thonë se nëse sot nuk e punojnë tokën, nesër për ta është shumë vonë.
Kujdesi i banorëve të këtij fshati është madh, pavarësisht që në të gjithë komunën e Dragashit, nuk është asnjë person i prekur me koronavirusin.
Zgatari, përveç bukurive njihet edhe si fshati më i vjetër në këtë regjion.
Ndryshe, emri Zgatar, këtij fshati i ka mbetur për shkak të shtrirjes së fshatit, i cili shtëpitë i ka të renditura në formë të zgjatur në të dy anët e rrugës, që sipas banorëve do të thotë Zgatar, apo fshat i zgjatur.
