Autor: Rijad Haliti
Rruga mund të jetë e ndryshme për të gjithë, por të gjithë ndajnë një gjë të përbashkët – qëllimin për një jetë më të mirë.
Ndonjëherë, të gjithëve na ndodh të përjetojmë ndjenjën e pakënaqësisë, mos arritjes dhe mos afirmimit të dëshiruar. Ne e dëshirojmë suksesin, por rruga që na dërgon drejt suksesit është e mbushur me pengesa, vështirësi, sfida e mundime. Natyrisht nëse merr guximin që t’ia fillosh asaj rruge atëherë gjysma e suksesit është arritur.
E tillë ishte rruga dhe shtegëtimi im si student, e tani edhe si pjesë e udhëheqësisë së studentëve, konkretisht si kryetar i Fakultetit Ekonomik. Aq sa është e madhe barra dhe përgjegjësia për të qenë gjithmonë i gatshëm, i drejtë dhe korrekt në punën time, edhe më e madhe është kënaqësia dhe nderi që t’u shërbejë dhe ndihmojë në çdo kohë dhe për çdo gjë kolegëve të mi.
Të jesh kryetar për mua nuk do të thotë thjesht një titull apo një emërim, por në shenjë modestie do të thotë një shpërblim i punës së palodhshme, për të cilën jo vetëm unë, por besojë edhe çdo kush tjetër do të vepronte dhe punonte në të njejtën mënyrë. Sa herë që përmendet fjala “student” dhe “puna në të mirë të studentit”, nuk kursehem për asgjë dhe askënd, por mundohem që secilën herë të jap më shumë nga vetja ime për t’i ndihmuar studentët, jo në thirrjen si kryetar por si mik apo kolegë i tyre.
Padyshim se rëndësia në shoqëri fillon me gjëra të vogla e të thjeshta. Një ndihmë e vogël e dhënë sot, nesër mund të jetë e madhe për çdo kënd. Më e bukura e gjithë kësaj është se kështu fillova dhe unë, me aktivitete dhe ndihma të vogla brenda grupit e gjeneratës time në fakultet, e të cilat dalëngadalë me kalimin e kohës, filluan të zgjerohen, të rriten e të marrin përmasa më të mëdha, falë të cilave gjendem këtu ku jam sot.
Një gjë është e sigurt, se do të vazhdojë të kontribuojë dhe të bëjë përpjekje edhe më të mëdha që gjërat të ndryshojnë gjithmonë në dobi të studentëve dhe që në një mënyrë apo në një tjetër unë të jem zëri përfaqësues i tyre dhe së bashku me ta të jemi bashkëudhëtarë në rrugën e dijes, diturisë dhe arsimimit. Ngase vetëm në këtë mënyrë, duke u arsimuar do të arrijmë të bëhemi edhe ne kuadro premtuese në të ardhmen dhe synojmë të ndërtojmë një pasqyrë të denjë për përfaqësimin e vetvetës, Universitetit dhe gjithë vendit tonë.
Prandaj, duhet punë dhe vetëm punë për të arritur gjithë suksesin që dëshiron. Mbi të gjitha duhet ta duash punën që e bënë, ashtu siç e dua unë punën time si kryetar dhe t’i kushtosh shumë nga koha jote, të jesh gjithmonë vetja dhe të besosh në vetvete.
Unë jam i hapur dhe mirëpres bashkëpunime dhe iniciativa të reja, sepse secila iniciativë mund të jetë një gurë i fortë në murin e të ardhmes tonë.
Me respekt,
Rijad Haliti,
kryetari i Fakultetit Ekonomik, Universiteti “Ukshin Hoti”.
(Shkrimi në këtë artikull nuk shpreh qëndrimet dhe opinionet e redaksisë së Portalit “Opoja.net“. E gjithë përgjegjësia e shprehjeve, bie mbi autorin e këtij opinioni).
Dërgoni edhe ju opinionin tuaj në këtë email: info@opoja.net)
