Sahime Domuzet u rrah për vdekje me mjete të forta nga kunata e saj, e cila dyshohet se në vazhdimësi ka ushtruar dhunë ndaj saj. 67-vjeçarja nuk arriti t’u bëjë ballë plagëve dhe për pasojë ndërroi jetë. E dyshuara, Nazire Abdyli, është arrestuar dhe tashmë Prokuroria ka dalë me komunikatë në lidhje me rastin.
Ndaj të dyshuarës, Prokuroria Themelore në Prizren, ka kërkuar caktimin e masës së paraburgimit nga Gjykata Themelore në Prizren, për shkak dyshimit të bazuar se e njëjta ka kryer veprën penale “Vrasje e rëndë”
Sipas kërkesës së prokurorisë, “e pandehura N.A., me dashje ka privuar nga jeta anëtaren e familjes – motrën e bashkëshortit të saj, me të cilën ka bashkëjetuar në ekonomi të përbashkët familjare, në atë mënyrë që me datë 23.12.2022, rreth orës 10:00, derisa e ndjera ishte e shtrirë në njërën nga dhomat e shtëpisë, e pandehura me anë të një shkopi prej druri të modifikuar e godet disa herë viktimën në kokë dhe në pjesë të ndryshme të trupit duke i shkaktuar gjakderdhje në tru, dhe si pasojë e këtij lëndimi e njëjta ka ndërruar jetë me datë 26.12.2022, rreth orës 05:30″, thuhet në njoftimin e prokurorisë.
E dyshuara e ka pranuar veprën të cilën dyshohet se e ka kryer dhe ka njoftuar se mjetet të cilat i ka përdorur për vrasjen e kunatës i ka fshehur. Arrestimi i saj është bërë pas intervistimit për herë të dytë, ku para hetuesve policorë ka rrëfyer ngjarjen në tërësi.
Shënim: Personi i apostrofuar në këtë artikull prezumohet i pafajshëm derisa fajësia e tij të mos provohet me vendim të formës së prerë nga gjykata.
Opojanet ka hapur kanalin në Whats App dhe ju mund të na bashkoheni për të ndjekur lajmet tona BASHKOHU KËTU.
