Bashkëvendësi ynë Yrmet (Idajet) Shabani nga fshati Kosavë, është i doktoruari i radhës nga Opoja. Ai më 2 qershor 2022 ka mbrojtur me sukses të lartë punimin e doktoratës me titull “Përgatitja e sistemit arsimor te Republikës se Kosovës për procesin e identifikimit dhe pune me nxënësit e talentuar dhe me dhunti”. Gradën doktor shkence i psikologjisë, Yrmeti e ka arritur në Fakultetin e Pedagogjisë në Universitetin Shtetëror të Maqedonisë në Manastir. Mentore e doktoratës ka qenë prof. dr. Tatjana Atanasovska.
Dr. Yrmet Shabani është i lindur më 20 qershor 1977 në fshatin Kosavë. Shkollën fillore e ka kryer në vendlindje ndërsa gjimnazin në Sharr. Studimet universitare i ka kryer në Fakultetin Filozofik, Dega e Pedagogjisë në Universitetin e Prishtinës. Studimet postdiplomike i ka vazhduar në Universitetin Shtetëror të Tetovës, Dega Psikologjisë, ku ka marrë titullin magjistër i Psikologjisë.
Në Universitetin Shtetëror të Maqedonisë në Manastir, ka vazhduar studimet e doktoratës dhe ka mbrojtur me sukses disertacionin e doktoratës përpara komisionit në përbërje: prof. dr. Tatjana Atanasovska, prof. dr. Ljupco Kevereski, prof. dr. Violeta Arnaudova, prof. dr. Dean Iliev dhe prof. dr. Dobri Petrovski.
Dr. Yrmeti është autor i disa punimeve shkencore dhe hulumtimeve nga fusha e psikologjisë. Gjatë vitit 2007-2008 ka ndjekur trajnime dhe kurse adekuate në Universitetin e Vjenës në Austri. Është trajnuar dhe certifikuar nga Organizata qeveritare dhe joqeveritare si brenda ashtu edhe jashtë vendit.
Në periudhën 2003-2006 ka punuar si arsimtar i lëndës Edukata Qytetare në Shkollën Fillore “Lekë Dukagjini” në Prizren. Në të njëjtën periudhë ka qenë i angazhuar si Pedagog ne Projektin e organizatës komunale të Kryqit të kuq të Kosovës në Prizren “Fëmijët me vështirësi të natyrave të ndryshme dhe inkuadrimi tyre në shkollat e rregullta”.
Që nga viti 2012 punon në Qendrës Burimore “Nënë Tereza” në Prizren, fillimisht si psikolog e më pas si drejtor. Dr. Yrmeti është edhe kryetar i Bordit Industrial (këshillëdhënës) të Fakultetit të Filologjisë në Universitetin “Ukshin Hoti” në Prizren. (Demir Reshiti, për Opoja.net)
Opojanet ka hapur kanalin në Whats App dhe ju mund të na bashkoheni për të ndjekur lajmet tona BASHKOHU KËTU.
