Muhammedi salallahu alejhi ue sel-lem, ka thënë: “Xhebraili alejhi-selam gjithmonë më porosiste që të përkujdesem për fqinjët, sa që mendova se do vijë shpallje (urdhër) që të merr pjesë edhe në trashëgimi”. Pejgamberi, salallahu alejhi ue sel-lem, e tha edhe këtë: “Njeriu nuk e ka besimin e plotë deri sa fqinji i tij të jetë i sigurt se nuk do t’i shkaktoj asnjë dëm.”
Këto dy hadithe-sherif e ilustrojnë shkëlqyeshëm qëndrimin Islam ndaj fqinjëve. Edhe pse këtyre haditheve nuk u nevojitet asnjëfarë shpjegimi shtesë, prapëseprapë do t’i përmendim disa nga obligimet që i kemi ndaj tyre, të cilat duhet rekomandohet të plotësohen nga çdo besimtar:
muslimani i vërtetë s’ka të drejt gjumi, nëse e di që fqinjin e ka të uritur;
doemos të ketë kujdes që të mos e ofendoj;
duhet ta qeras apo t’i dhuroj diçka nga pasuria që e posedon;
pa lejen e fqinjit, nuk lejohet as të shikoj në shtëpinë e tij;
nuk ka të drejtë t’i dëmtoj muret e shtëpisë së tij, të hedh mbeturina në kopshtin apo oborrin e tij;
duhet të përkujdeset për fëmijët e fqinjit, bile edhe t’i pastrojë nëse bëhen të pistë;
duhet që fqinjin ta takoj me fytyrë të kthjellët dhe buzëqeshur;
në rast nevoje t’i huazoj të holla, mjete pune apo ngjashëm;
në rast nevoje apo pikëllimi, me të duhet të bisedojë apo ta ngushëlloj;
në rast të mos pranisë së tij, duhet të kujdeset për shtëpinë e fqinjit;
në rast se e shet shtëpinë e vet, së pari duhet t’ia ofrojë atij;
pa pëlqimin e fqinjit, nuk preferohet shitja e shtëpisë ndonjë të panjohuri;
në rast nevoje fqinjit duhet t’ia mundësojë që të shërbehet me ujin e tij;
duhet të jetë më i durueshëm me të se sa që do të duronte dikë tjetër;
me fqinjin duhet të sillet ashtu siç dëshiron ai të sillet me të;
duhet të marrë pjesë në xhenazen e tij etj. etj.
Këto janë vetëm disa shënime dhe disa obligime me të cilat hasemi në jetën e përditshme. Nënkuptohet që obligime të tilla ka plotë. Edhe thëniet e vjetra popullore në të cilat ka urtësi të madhe e theksojnë se për fqinjin duhet ta kujdesemi më tepër se sa për vëllain.
Opojanet ka hapur kanalin në Whats App dhe ju mund të na bashkoheni për të ndjekur lajmet tona BASHKOHU KËTU.
